कुमार पाैडेल मुठभेडमा मारिएका हाेइनन्ः मानवअधिकारवादी संस्था

काठमाडाैं-प्रदेश २ अन्तर्गत रहेर मानव अधिकारको क्षेत्रमा सक्रिय विभिन्न संस्थाले विप्लव नेतृत्वकाे नेकपाका सर्लाही इन्चार्ज कुमार पौडेल प्रहरीसँगको मुठभेडमा मारिएका भन्ने कुरा गलत भएकाे दाबी गरेका छन् । 

अनौपचारिक क्षेत्र सेवा केन्द्र (इन्सेक), एडभोकेसी फोरम नेपाल, तराई मानव अधिकार रक्षक सञ्जाल, महिला मानव अधिकार रक्षा सञ्जाल, नेपाल मानव अधिकार संगठन र उन्नत नेपालले अध्ययन पश्चात जनकपुरमा प्रतिवेदन सार्वजनिक गरेका हुन् ।

प्रतिवेदनमा पौडेलको दोहोरो भिडन्तमा मृत्यु भएको हो भन्ने विश्वसनीय आधार नदेखिएको निष्कर्ष प्रस्तुत छ । प्रतिवेदनमा प्रहरीले भिडन्तको नाममा नियन्त्रणमा लिएर पौडेलको हत्या गरेको घुमाउरो भाषा प्रयोग गरिएको छ ।

प्रतिवेदनमा भनिएको छ, ‘पौडेलको दोहोरो भिडन्तमा नभई नियन्त्रणमा लिएपश्चात हत्या गरिएको हुनसक्ने यथेष्ठ सम्भावना रहेकाे देखिन्छ ।’

विगत केही वर्षदेखि मुठभेडका नाममा व्यक्तिको हत्याको श्रृंखला बढेको पनि प्रतिवेदनमा उल्लेख गरिएकाे छ ।

इन्सेक प्रदेश २ का संयोजक राजु पासवानले घटनाको प्रकृति र विभिन्न दृष्टिले अध्ययन गर्दा पनि पौडेल समूह र प्रहरीबीच भिडन्त भएको नदेखिएको बताए । उनले भने, ‘घटना गम्भीर प्रकृतिको हो । त्यसैले निष्पक्ष छानबिनका लागि उच्चस्तरीय न्यायिक छानबिन समिति गठन हुनुपर्छ । पोष्टमार्टम रिपोर्ट अस्पतालले दिन नमानेकाले घटना दबाउने प्रयास भइरहेको आशंका छ ।’

प्रतिवेदन सार्वजनिक गरेका संस्थाहरुले विभिन्न ६ बुँदे माग समेत राखेका छन् । ती संस्थाले निष्पक्ष छानबिनका लागि उच्च स्तरिय समिति गठन, घटनामा संलग्नलाई कानूनी दायरामा ल्याउन तथा दण्डहीनता अन्त्य, कथित मुठभेडका नाममा व्यक्ति हत्याजस्तो जघन्य अपराधमा संलग्न संस्था वा व्यक्तिलाई उत्तरदायी बनाउन माग गरेका हुन् ।