कांग्रेसकाे जारी केन्द्रीय समिति बैठकमा विवाद चुलिँदै

काठमाडाैं-विधान बमोजिम पार्टी संगठनको अन्तरिम व्यवस्था गर्ने विषयलाई लिएर नेपाली कांग्रेस केन्द्रीय कार्यसमितिमा विवाद थप चुलिएकाे छ । २२ असारदेखि शुरु भएको पार्टी केन्द्रीय कार्यसमिति बैठकमा संक्रमणकालीन व्यवस्थाअनुसार पार्टीका आठवटा संगठन गठन गर्ने विषयलाई लिएर शीर्ष नेताबीच नै विवाद भएको छ ।

करिब एक महिनासम्म चलेको बैठकले समेत निष्कर्ष निकाल्न नसकेपछि उपसभापति विमलेन्द्र निधि र महामन्त्री डा. शशांक कोइराला रहेको कार्यदललाई दुई दिनभित्र उपयुक्त प्रस्ताव ल्याउने जिम्मेवारी दिइएको छ ।

केन्द्रीय सदस्य महेश आचार्यले विधानको दफा ७२ को उपदफा २ मा पार्टी केन्द्रीय कार्यसमिति, सिमाङ्कन हेरफेर नभएका जिल्ला कार्यसमिति र सिमाङ्कन परिवर्तन नभएका स्थानीय तहका कार्यसमिति यथावत कायम रहने व्यवस्था भएको भन्दै बुधबारको बैठकमा नेतृत्वको ध्यानाकर्षण गरएका थिए ।

‘पार्टी विधानको यो दफाले तत्कालीन लोकतान्त्रिक फोरमबाट आएका नेता कार्यकर्तालाई सिमाङ्कन परिवर्तन वा हेरफेर नभएका निकायमा समायोजन गर्न सकिँदैन’, केन्द्रीय सदस्य महेश आचार्यको भनाइ उधृत गर्दै एक सदस्यले भने ।

मंगलबार केन्द्रीय समिति बैठकमा एक घण्टासम्म बोलेका गच्छदारले आचार्यको भनाइप्रति प्रतिवाद गरेका थिए । उनले आफ्नो नेतृत्वमा आएका लोकतान्त्रिक फोरमका कार्यकर्तालाई विधान आकर्षित नहुने दाबी गरेका थिए ।

वरिष्ठ नेता रामचन्द्र पौडेलले उपसभापति गच्छदारलाई ‘लोकतान्त्रिक फोरमबाट कांग्रेसमा कति कार्यकर्ता समावेश भएको हो, त्यसको विवरण दिन’ आग्रह गरे । पौडेलसँगको सवालजबाफमा गच्छदारले भने, ‘कांग्रेसको अधिवेशनबाट निर्वाचित महाधिवेशन प्रतिनिधिको त विवरण छैन भने मेरो पार्टीको कहाँबाट हुनु ?’