रौतहट र नुवाकोटका वडा कार्यालयमा विस्फोट, मकवानपुरका ४ ठाउँमा बम

काठमाडौं- नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीले आह्वान गरेका बन्दको प्रभाव उपत्यकाबाहिरका जिल्लामा बढी परेको देखिएको छ। हालसम्म मकवानपुरको हेटौडा उपमहानगरपालिकाका विभिन्न ४ स्थानमा बम फेला परेको छ भने नुवाकोट र राैतहटका वडा कार्यालयमा बम विस्फोट तथा आगजनी भएका छन्।

नुवाकोटको ककनी गाउँपालिका-१ को वडा कार्यालयमा मंगलबार राति बम विस्फोट गराइएको हो। विस्फोटबाट वडा कार्यालयका महत्त्वपूर्ण कागजपत्रलगायत सरसामान नष्ट भएका छन्।

बम विस्फोट विप्लव समूहले गराएको आशंका गरिए पनि अहिलेसम्म यसको जिम्ममा लिएको छैन। घटनाबारे थप अनुसन्धान भइरहेको प्रहरीले जनाएको छ।

त्यसैगरी रौतहटको चन्दपुर नगरपालिकाको गैंडाटारमा रहेको वडा कार्यालयमा आगजनी भएको छ। मंगलबार मध्यराति अज्ञात समूहले आगजनी गरेको हो।

आगजनीबाट कम्प्युटर, प्रिन्टर, फर्निचरलगायत सामान जलेर नष्ट भएका छन्।

घटनाको जिम्मेवारी कसैले लिएको छैन।

उता मकवानपुरको हेटौंडा उपमहानगरपालिका–४ मा क्विक पार्टी प्यालेसको अगाडि भित्री सडक छेउमा निलो जेब्रा झोलामा कुकुर राखी सोबाट तार निकालेको अवस्थामा शंकास्पद वस्तु भेटिएएको थियो।

मंगलबार राति पौने १२ बजे फेला परेको शंकास्पद वस्तुलाई मध्य पृतना सुपारेटार ब्यारेकबाट खटिएको नेपाली सेनाको बम डिस्फोजल टोलीले डिस्फोज गरेको थियो।

उक्त स्थान वडा प्रहरी कार्यालय हेटौंडाबाट २ किलोमिटर पश्चिममा पर्छ।

मकवानपुरको हेटौंडा-११, थानार्‍याङस्थित शदा शिवम् पेट्रोल पम्प नजिक पूर्व-पश्चिम राजमार्गमा प्रेसर कुकरमा टेप लगाई तार निकालेको शंकास्पद वस्तु बुधबार बिहान साढे ३ बजे फेला परेको प्रहरीले जानकारी दिएको छ। नेपाली सेनासँग समन्वय गरेर सवा ४ बजे बिहान उक्त बम डिस्पोज गरिएको प्रहरी प्रधान कार्यालयले जनाएको छ। उक्त वस्तु डेटोनेटर भएको प्रहरीले जनाएको छ।

हेटौंडा–११, चौकीटोलमा रहेको खाद्य संस्थान अगाडिको बाटोमा प्रेसर कुकरमा टेप लगाई तार निकालेको अवस्थामा अर्को शंकास्पद वस्तु फेला परेको थियो। नेपाली सेनाले उक्त वस्तु डिस्पोज गरेको छ।

कुकरभित्र एउटा डेटोनेटर राखिएको फेला परेको प्रहरीले जनाएको छ। बम राखेको आशंकामा प्रहरीले एक जनालाई पक्राउसमेत गरेको छ। यद्यपि उनको नाम भने गोप्य राखिएको छ।

हेटौंडा उपमहानगरपालिका–४, परिजात पथस्थित नारायणी नर्सिङ कलेज नजिक प्रेसर कुकर बम फेला परेको थियो। नेपाली सेनाको मध्य-पृतना सुपारेटार ब्यारेकबाट क्याप्टेनको कमान्डमा खटिएको टोलीले बिहान साढे ७ बजे उक्त बम डिस्पोज गरेको थियो।

कुकरभित्र एउटा डेटोनेटर र गिटी बालुवा फेला परेको प्रहरीले जनाएको छ।