तेरिया ‘झलक दिखला जा’ को फाइनलमा , जनवरी १४ देखि अनलाइन भोटिङ खुल्ला

काठमाडौं – ‘डान्स इन्डिया डान्स’२०१४ को उपाधि बिजेता तेरिया फौजा मगर बलिउडकै अर्काे टेलिभिजन रियालटी सो ‘झलक दिखला जा’को फाइनलसम्मको यात्रा तय गर्न सफल भएकी छिन् ।

भारतीय टीभी कलर्सले डान्स स्टार बीच प्रतिस्पर्धा गराएको यो प्रतियोगीतामा तेरिया भारतीय सिनियर डान्स स्टार बीच स्पर्धा गरिरहेकी छन् । विजेताहरु बीच प्रतिस्पर्धा रहने यो प्रतियोगिता भारतीय टीभी सोको सर्वाधिक पुरस्कार राशिको हो । प्रतिस्पर्धाको विजेताले ३० लाख भारतीय रुपैयाँको साथमा रेनाल्ड डस्टर ब्रान्डको कार जित्न सक्नेछिन् ।

१४ वर्षे तेरियाले डीआईडी विजेताको तर्फबाट ‘झलक दिखला जा’ सिजन ९ मा प्रवेश पाएकी हुन् । गत जुलाईमा सुरु भएको प्रतियोगीतामा १२ जोडी सिनियर महिला पुरुष डान्स सेलिबे्रटी छनोट भएका थिए ।

तेरियासहित ५ जना जुनियरलाई भने अक्टोबर ८ मा च्यालेन्जरका रुपमा प्रवेश गराइएको थियो । च्यालेन्जरका रुपमा प्रवेश पाएका मध्ये तेरिया मात्रै फाइनलमा पुगन सफल भएकी छन् । फाइनलमा उनले ‘डीआईडी’ सिजन १ का विजेता तथा ‘झलक दिखला जा’ का पूर्व विजेता सलमान युसुफ खान र वल्र्ड हिपहपका च्याम्पियनसिपका विजेता सानतनु महेश्वरीसँग प्रतिस्पर्धा गर्ने छिन् ।

फाइनलमा रहेको तीनजना मध्ये अहिलेसम्म तेरिया अगाडि रहेको बताइएको छ । प्रतियोगिताको उपाधिका लागि जनवरी १४ तारिखदेखि २१ सम्म एसएमएस र अनलाइन भोटिङ पनि खुल्ला हुँदैछ ।

तेरिया फाउन्डेसनले हालै बुटवलमा पत्रकार सम्मेलन गर्दै तेरियालाई भोटको अपिल समेत गरेको छ । कलर्स टीभीमा हरेक शनिबार दस बजेपछि यो कार्यक्रम प्रसारण हुँदै आएको छ ।