पाकिस्तानका पूर्वप्रधानमन्त्री शाहिद खाकान अब्बासी गिरफ्तार

काठमाडौँ -पाकिस्तानका पूर्वप्रधानमन्त्री शाहिद खाकान अब्बासी गिरफ्तार भएका छन् । भ्रष्टाचारसम्बन्धी मुद्दा हेर्ने अदालतमा उनलाई लगिने सरकारी अधिकारीहरूले जानकारी दिएका छन् । वर्तमान प्रधानमन्त्री इमरान खानका पूर्ववर्ती अब्बासी प्रतिपक्षी दलका नेताहरूमध्ये प्रभावशाली नेता मानिन्छन् ।

उनी पाकिस्तान मुस्लिम लिग नवाज (पीएमएल—एन) का नेता हुन् । सो पार्टी पछिल्लो निर्वाचनमा नराम्ररी पराजित भएको थियो ।

एक वरिष्ठ सरकारी अधिकारीले भने, ‘अब्बासीलाई गिरफ्तार गरिएको छ, उहाँलाई आज वा भोलि अदालतमा लगिनेछ ।’ नाम नखुलाउने शर्तमा एक अधिकारीले दिएको गिरफ्तारसम्बन्धी सूचनालाई अर्का सरकारी अधिकारीले पनि पुष्टी गरेका छन् ।

अब्बासीले सन् १९१७ को अगस्टदेखि २०१८ मेसम्म प्रधानमन्त्रीको जिम्मेवारी सम्हालेका थिए । अर्का पूर्वराष्ट्रपति असिफ अली जर्दारीलाई भ्रष्टाचारको आरोपमा गिरफ्तार गरिएको एक हप्तापछि अब्बासीलाई गिरफ्तार गरिएको हो ।

अब्बासीका पूर्ववर्ती प्रधानमन्त्री नवाज सरिफलाई भने यसअघि गत वर्ष नै सातवर्षे जेल सजायको फैसला सुनाइएको थियो । भ्रष्टाचारविरुद्ध काम गर्ने अधिकारीहरूले नवाजका भाइ शहवाज सरिफलाई पनि लक्षित गरिरहेको बताइएको छ । 

पाकिस्तानमा भ्रष्टाचार ठूलो समस्याको रूपमा रहेको छ । एक वर्ष अगाडि प्रधानमन्त्रीका रूपमा खान निर्वाचित भएपछि उनले भ्रष्टाचारविरुद्धको कारबाहीलाई उच्च प्राथमिकता दिएका छन् ।