नेपाल भारतसँग ३-१ पराजित

काठमाडौं – चौथो साफ च्याम्पियनसिप महिला फुटबलको सेमिफाइनलमा नेपाल भारतसँग ३-१ गोल अन्तरले पराजित भएको छ । अघिल्लो तीन वटै संस्करणमा फाइनलमा भारतसँग हारेको नेपाल यसपटक पनि सेमिफाइनलमा भारतसँगै हार्‍यो ।

 
भारतको सिलिगुडीमा रहेको कञ्चनजंगा स्टेडियममा खेलको ४४ औँ मिनेटमा भारतकी कमला देवीको गोलले नेपाल पहिलो हाफमा १–० ले पछि परेको थियो । ५९ औँ मिनेटमा भारतकी इन्दुमतीको गोलले नेपाल २–० ले पछि परेको हो ।

७५ औँ मिनेटमा पाएको पेनाल्टी सदुपयोग गर्दै नेपालकी सावित्रा भण्डारीले गोल गरेर खेल २–१ को स्थितिमा पुर्‍याइन । फेरि ८४ औँ मिनेटमा सस्मिता मल्लिकको गोलले नेपाल ३–१ को स्थितिमा पुगेर खेल हारेको हो ।

 
आइतबार भारत बंगलादेशसँग गोलरहित बराबरीमा रोकिएपछि नेपाल र भारत सेमिफाइनलमै भेटिएका थिए । नेपाल समूह विजेता र भारत उपविजेता बन्दै अन्तिम चारमा पुगेका हुन् ।

 
खेलअघि प्रतिक्रिया दिँदै नेपालका प्रशिक्षक कुमार थापाले बलियो मनस्थितिमा भएकाले खेल जित्ने विश्वास गरेका थिए । उनले भनेअनुसारको खेल भने प्रदर्शन हुन सकेन । नेपालले पाएका केही गोलका राम्रा अवसर खेल फाल्दा यसपटक पनि नेपाली टोलीमाथि भारत नै हाबी रह्यो ।