कुवेतमा आफ्नै साथीद्वारा नेपालीको हत्या

काठमाडौं-कुवेतको सुभानमा एक नेपालीको चक्कु प्रहारबाट अर्का नेपालीको मृत्यु भएको छ ।

अाइतबार अल यासरा फुड कम्पनीमा कार्यरत मोरङका २६ वर्षीय जिवन भट्टरार्इलार्इ सोही कम्पनीमा कार्यरत रसुवाका राजेश ग्यावाले चक्कु प्रहार गरेका थिए ।
उनीहरू दुबै जना डिउटीमा रहेको समयमा राजेशले आफ्नै रुम पाटनरको हत्या गरेका हुन् ।

करिब ८ महिनापहिला उनीहरू रोज़गारीको लागि कुवेत गएका थिए । मृतक जिवन मिल्स स्टोरमा कार्यरत थिए भने राजेश ड्राइभर थिए ।
राजेशले क़रिब एक महिना पहिलादेखि आफूलार्इ मानसिक समस्या रहेको बताउदै गत डिसेम्बर २२ तारिकदेखि कम्पनीमा राजिनामा दिएर कोठामै बसेको बताइन्छ ।

घटनास्थल पुगेको कुवेत प्रहरीले राजेश ग्यावासहित सोही कोठामा बस्ने लालबहादुर बोहोरा र राम बाबु दमाइलार्इ नियन्त्रणमा लिएकाे छ ।