विप्लव कार्यकर्ता र प्रहरीको ५ मिनेटको अन्तरमा मृत्यु

काठमाडौं-भोजपुरमा प्रहरी र नेत्रविक्रम चन्द विप्लव समूहका कार्यकर्ताबीच भएको भिडन्तमा आज बिहान दुई जनाको ज्यान गएको छ। गोली हानहान हुँदा एक प्रहरी र एक विप्लव समूहका कार्यकर्ताको मृत्यु भएको हो।

भोजपुर नगरपालिका–७ हटियालाइनमा भएको भिडन्तमा प्रहरी जवान सञ्जीव राई र विप्लव समूहका ओखलढुंगा इन्चार्ज नीरकुमार राईको मृत्यु भएको हो। बिहान ८ः४५ मा भिडन्त भएको थियो ।

प्रहरी प्रधान कार्यालयका अनुसार विप्लवका केहि कार्यकर्ता हतियार सहित प्रवेश गरको भन्ने गोप्य सूचनाको आधारमा जिल्ला प्रहरी कार्यालय भोजपुरबाट प्रहरी जवान सञ्जिव राई, खेमनाथ भट्टराई र सुरेन्द्र माझी हटियालाइन पुगेका थिए ।

उनीहरुले शंका लागि सोधपुछ तथा चेक गर्न खोज्दा नेकपा विप्लवको ओखलढुङ्गा इन्चार्ज अन्दाजी ३५ वर्षीय निरकुमार राईले पेस्तोल निकाली इलाका प्रहरी कार्यालय लेटाङ दरबन्दी भइ जिल्ला प्रहरी कार्यालय भोजपुरमा कार्यरत प्रहरी जवान संजिव राईको कोखामा गोली प्रहार गरेको प्रहरी प्रधान कार्यालयले जनाएको छ ।

त्यसपछि प्रहरीले जवाफी फायर गर्दा विप्लव कार्यकर्ता राई पनि घाइते भएका थिए । घाइते अवस्थामै रहेका विप्लव कार्यकर्ता राई भाग्न खोजेपछि प्रहरी जवान खेमनाथ भट्टराईसँग लछारपछार भएको थियो । सोही क्रममा भट्टराईको बाँया कुमको हड्डी भाँचिएको प्रहरीले जनाएको छ ।

घाइते दुबैलाई उपचारको लागि जिल्ला अस्पताल भोजपुर लगिएकोमा उपचारको क्रममा प्रहरी जवान राईको ९ः१५ मा मृत्यु भएको थियो । त्यसको ५ मिनेटपछि विप्लव कार्यकर्ता राईको ९ः२० मा मृत्यु भएको प्रहरी प्रधान कार्यालयले जनाएको छ ।

प्रहरी जवान भट्टराई र माझीको अवस्था सामान्य रहेको छ ।

निरकुमारको साथबाट एउटा चाइनिज पेस्तोल र ६ राउन्ड गोली बरामद भएको छ। घटनास्थल जिल्ला प्रहरी कार्यालयबाट ७ सय मिटर पश्चिममा पर्छ । विप्लव समूहका ४/५ जना अन्य व्यक्ति पनि त्यहाँ आएको हुनसक्ने प्रहरीले जनाएको छ । उनीहरुको खोजी भए पनि फेला पर्न सकेको छैन ।

यसअघि विप्लव समूहका भोजपुरमै तीर्थराज घिमिरे र सर्लाहीमा कुमार पौडेल मारिएका थिए। काठमाडौंमा भएको बम विस्फोटमा ५ जनाको ज्यान गएको थियो।