पाँचथरमा ११५ परिवारलाई सरकारले घर बनाइ दिने

पाँचथर-पाँचथरमा दलित र माझी समुदायमा ११५ विपन्न परिवारलाई घर निर्माण गरीने भएको छ । संघीय सरकार र प्रदेश सरकारको संयुक्त लगानीमा जनता आवास कार्यक्रम अन्तर्गत सरकारले त्यति परिवारको घर निर्माण गरीदिने भएको हो ।

पाँचथरका आठ वटै स्थानीय तहमा उक्त संख्यामा घर निर्माण गर्न लागिएको हो । कार्यक्रम अन्तर्गत पाँचथरमा फिदिम नगरपालिकामा वडा नं. ४, ५, ७, ८ र ९ नं. वडामा माझी समुदायका १० तथा दलित समुदायका १८ वटा घर निर्माण हुनेछन् । यस्तै तुम्बेवा गाँउपालिका वडा नं. १ र २ मा माझी र दलित समुदायका गरि ११ वटा घर निर्माण हुनेछन् । कुम्मायक गाँउपालिका वडा नं. १, ३ र ५ मा माझी समुदायका १० तथा दलित समुदायका ६ वटा घर निर्माण हुने शहरी विकास तथा भवन कार्यालय इलामका प्रमुख सुमनकुमार मिश्रले जानकारी दिए ।

कार्यक्रम अन्तर्गत फाल्गुनन्द गाँउपालिका वडा नं. ५ मा माझी र दलित समुदायका लागि २० वटा घर, मिक्लाजुङ गाँउपालिका वडा नं. ३ र ५ मा माझी र दलित समुदायका लागि ११ वटा घर निर्माण हुने मिश्रले बताए । फालेलुङ गाँउपालिकाका वडा नं. १ र ५ मा दलित समुदायका १३ वटा घर तथा याङवरक गाँउपालिकामा ५ वटा घर निर्माण हुनेछन् भने हिलिहाङ गाँउपालिका वडा नं. २ र ७ मा दलित र माझी समुदायका लागि ११ वटा घर निर्माण हुने शहरी विकास तथा भवन कार्यालयले जनाएको छ ।

पाँचथरमा गत बैशाक २ गतेदेखि ११ गतेसम्म लाभग्राही समुदायको विवरण सङ्कलनका लागि सर्भेक्षण फारम भर्न आव्हान गरिएको थियो । सर्भेक्षण फारम स्थानीय तहको कार्यालय तथा सम्बन्धित वडा कार्यालयमा वितरण गरिएको थियो । सर्भेक्षण फारम इलाम स्थित कार्यालयमा सङ्कलन भइरहेको मिश्रले जानकारी दिए । कार्यालयसँग प¥याप्त जनशक्ति नरहेकाले स्थानीय तहको सहयोगमा उक्त कार्यक्रम अघि बढाइएको मिश्रको भनाई छ ।

यसरी घर निर्माण हुनेछन्

कार्यालयले लाभग्राहीले भरेको सर्भेक्षण फारमका आधारमा घर निर्माणको निक्र्यौल गर्नेछ । लाभग्राही परिवारको हालको घरको अवस्था, आर्थिक अवस्था तथा पेशा ब्यवसायको अवस्थाका आधारमा अङ्क प्रदान गरि सबैभन्दा पीडित परिवारहरु मध्येबाट घर निर्माण गरिने कार्यालय प्रमुख मिश्रले जानकारी दिए । छनौट भएका कमजोर अवस्थाका परिवारको स्थलगत निरीक्षण पछि मात्रै घर निर्माण हुनेहरु सूचि प्रकाशन गरिने उनले बताए । छनौट भएका प्रत्येक परिवारलाई एकै किसिमको घर निर्माणको डिजाइन प्रदान गरिनेछ । दुई वटा कोठा, किचन तथा शौचालय भएको, इटा वा ढुङ्गाको गाह्रो भएको, जस्तापाताको छानो भएको घर निर्माणको डिजाइन कार्यालयले प्रदान गर्नेछ ।

प्रत्येक परिवारलाई रु. तीन लाख ३२ हजार

प्रत्येक परिवारलाई रु. ३ लाख ३२ हजार पाँच सयका दरले रकम प्रदान गरिने मिश्रले जानकारी दिए । तर, उक्त रकम एकामुष्ठ प्रदान गरिँदैन् । घरको जग निर्माण गरिसकेपछि लाभग्राहीले २५ प्रतिशत रकम पाउनेछन् । यस्तै वीपीसी लेभल निर्माणपछि दोश्रो किस्ता वापत ३० प्रतिशत रकम प्रदान गरिने मिश्रले जानकारी दिए । घरको पर्खाल निर्माण गरिसकेपछि तेश्रो किस्ता वापत ३५ प्रतिशत रकम प्रदान गरिनेछ भने घरको निर्माण पूरा गरि रङ्गरोकन समेत सम्पन्न गरेपछि बाँकी १० प्रतिशत रकम प्रदान उनले बताए ।

कार्यक्रम पूर्वी पहाडमा पहिलो पटक

शहरी विकास तथा भवन कार्यालय इलामले पूर्वी पहाडी जिल्लाहरुमा पहिलो पटक यो कार्यक्रम लागू गरेको हो । चालू आर्थिक वर्षमा पाँचथरमा ११५ वटा सहित इलाममा १ सय वटा तथा ताप्लेजुङमा ९५ वटा घर निर्माण गर्ने तयारी गरिएको कार्यालय प्रमुख मिश्रले जानकारी दिए । उक्त कार्यालयले झापामा विगत वर्षबाटै यो कार्यक्रम सञ्चालन गरिरहेका छ । झापामा चालू आर्थिक वर्षमा ५ सय वटा घर निर्माण गर्ने कार्यालयको कार्यक्रम छ । यद्यपी यसै आर्थिक वर्षमा घर निर्माणको कार्य पूरा हुने छैन । “यो आर्थिक वर्षमा सबै घरको निर्माण थाल्ने योजना छ” मिश्रले भने “जति निर्माण हुन्छ, त्यति रकम निकासा गर्दै जान्छौँ ।”