सरकारी खर्चमा बिदेशी अस्पताल जान कडाइ

काठमाडौं- सर्बसाधारणले चर्काे आलोचना गरेपछि सरकारले उच्चपदस्थ व्यक्तिले सरकारी खर्चमा विदेशमा उपचार गर्ने गरेको विषयको त्यसमा कडाइ गर्न थालेको छ । यो समाचार आजको राजधानी दैनिकमा छापिएको छ |

उपप्रधानमन्त्री तथा स्वास्थ्यमन्त्री उपेन्द्र यादवले धेरै खालका जटिल रोगको उपचार नेपालमै सम्भव भएको भन्दै विदेशमा हुने उपचारको खर्च अब सरकारले नतिर्ने बताएका छन् ।

संसद्मा मंगलबार विनियोजन विधेयकमाथि सांसदहरूले उठाएका प्रश्नको जवाफ दिँदै स्वास्थ्यमन्त्री यादवले अपवादबाहेक सबै रोगको नेपालमै उपचार सम्भव भएको भन्दै विदेशमा उपचार गर्न सरकारले खर्च नदिने बताए ।

मिर्गौला प्रत्यारोपण, मुटु-नसाको शल्यक्रियालगायतका रोगको पनि नेपालमै उपचार सम्भव भएको मन्त्री यादवले बताए । उनले भने, ‘विश्वास गरेर यहाँहरू पनि नेपालमै गर्नूस्, म पनि यहीँ उपचार गराउँछु, अब विदेश उपचार गर्न जाने कसैले पनि राज्यकोषबाट उपचार खर्च पाउँदैन ।’