मनै लोभ्याउने लब्रेकुटी

पाँचथर- लब्रेकुटी प्रदेश नम्बर एक कै मनमोहक पर्यटकीय क्षेत्र हो | यसको बिकासका लागि स्थानीय निकायमा प्रयास भइरहेको छ | फिदिम नगरपालिका–५ मा पर्ने यसको धार्मिक तथा पर्यटकीय प्रायोजनका लागि पूर्वाधार निर्माणको काम भइरहेका छन् ।
१६ औं राष्ट्रिय विभूती फाल्गुनन्द लिङदेनको कर्मभूमिको रुपमा परिचित लब्रेकुटीलाई धार्मिक पर्यटकीय गन्तब्यको रुपमा बिकास गर्न पूर्वाधार बनिरहेका हुन् ।

लब्रेकुटीमा अहिले प्रदेश सरकारको ८० लाख लागतमा धार्मिक प्रवचन मैदान र सवारी साधन पार्किङस्थल निर्माण भइरहेको छ । लब्रेकुटीस्थित फाल्गुनन्द प्रवेशद्वार–३ छेउमा ११० मिटर लम्बाई र ४५ मिटर चौडाइको धार्मिक प्रवचन मैदान निर्माण भइरहेको हो ।
त्यस्तै ५० भन्दा बढी ठूला सवारी साधन अटाउने पार्किङ स्थल पनि सँगै निर्माण भइरहेको निर्माण उपभोक्ता समितिका सचिव सुवाश तुम्बापोले बताए ।

लब्रेकुटी क्षेत्रमा स्थानीय, धार्मिक भक्तजन र राज्य समेतको लगानीमा विभिन्न पूर्वाधार निर्माण गरिंदै आएको छ । लब्रेकुटी क्षेत्रको पर्यटन प्रबद्र्धनका लागि फिदिमस्थित नयाँ सहरी बिकास आयोजना कार्यालयले डिपिआर तयार गरिसकेको छ । सोही अनुसार लब्रेकुटी क्षेत्रको चौतर्फी बिकासका लागि स्थानीय, प्रदेश र संघीय सरकारले लगानि गर्न आवस्यक रहेको किरात साङ्सेन वरक चोत्लुङ माङहिम लब्रेकुटिका प्रमुख पुजारी ध्रुव तुम्बापोले बताए । लब्रेकुटी क्षेत्र विभिन्न वनस्पतिक तथा जैविक विविधताको दृष्टिले समेत महत्वपूर्ण स्थलको रुपमा परिचित छ ।

लब्रेकुटी भ्रमण वर्ष मनाइने
नेपाल सरकारले पर्यटन वर्षको रुपमा मनाउने तयारी गरेको सन् २०२० लाई सहयोग पुग्ने गरी लब्रेकुटी क्षेत्र भ्रमण वर्षको रुपमा मनाइने किरात साङसेन वरक चोत्लुङ माङहिम लब्रेकुटि संरक्षण, सम्बद्र्धन तथा प्रबद्र्धन समितिका सचिव सुवाश तुम्बापोले बताए । सरकारको अभियानलाई समेत सहयोग पुग्ने गरी लब्रेकुटीमा आन्तरिक तथा बाह्य पर्यटक भित्र्याउन २०२० लाई लब्रेकुटी क्षेत्र भ्रमण वर्षको रुपमा मनाइने उनको भनाई छ ।

चुक्चिनाम्बा-लब्रेकुटि शान्ति पदयात्रा गरिने

आगामी वर्ष लब्रेकुटीमा राष्ट्रिय विभूति तथा समाज सुधारक फाल्गुनन्दको आगमन भएको एक शताब्दी पुग्दैछ । सो अवशरमा फाल्गुनन्दको जन्मभूमि इलामको माङसेबुङ गाउँपालिकास्थित चुक्चिनाम्बादेखि लब्रेकुटी (फाल्गुनन्द सर्किट) सम्म बिशाल शान्ति पदयात्रा समेत गर्ने तयारी भइरहेको छ । फाल्गुनन्द लब्रेकुटी प्रवेश गरेको शदाब्दीगाँठको अवसरमा विश्व शान्ति र मानव एकताको सन्देश दिन ५० हजार भक्तजनको सहभागितामा शान्ति पदयात्रा गरिने बताइएको छ ।