मैले राज्यलाई ५५ रोपनी जग्गा दिएँ : झलनाथ खनाल

काठमाडौँ- बिहीबार प्रतिनिधिसभामा सरकारको नीति तथा कार्यक्रममाथिको छलफलमा बोल्दै नेकपा एकीकृत समाजवादीका सम्मानित नेता झलनाथ खनालले एमाले अध्यक्ष केपी शर्मा ओलीले मात्रै राज्यलाई आफ्नो चलअचल सम्पती नदिएको बताएका छन् । छलफलमा नेता खनालले आफुले राज्यलाई ५५ रोपनी जग्गा दिएको बताएका हुन् । यस्तै उनले ओलीभन्दा १५ वर्ष अगाडि नै आफु प्रधानमन्त्री भएको पनि जानकारी गराएका छन् ।

खनालले भने, “उहाँले मैले सबै श्री सम्पती, चल अचल सम्पती राज्यलाई बुझाएँ त्यस्तो अरु कोही छ भन्नुभो ? मलाई यसको जवाफ दिन खसखस लागिहाल्यो । उहाँ जतिबेला प्रधानमन्त्री हुनुभयो, त्यो भन्दा निकै अगाडि म प्रधानमन्त्री भएँ । आजभन्दा १५ वर्ष अगाडि । त्यसबेला इलाममा रहेको मेरो पैत्रिक सम्पतीका रुपमा रहेको ५५ रोपनी जग्गा मैले राज्यलाई दिएर सीटीईभीटी निर्माण गरेँ । सिटीभिटी भवन निर्माण गर्न जग्गा खोज्दा झ्याप्प झुप्प मिलेन । अनि आफ्नै जग्गा दिएर सिटीइभिटी बनाएँ।”

खनालले ओलीको अर्को आरोपको पनि जवाफ दिदै प्रश्न गरे “नीति तथा कार्यक्रम आफ्नै नेतृत्वको सरकारले ल्याएभन्दा फरक नरहेको भनेको भन्दै आफैले ल्याएको नीति तथा कार्यक्रम काम नलाग्ने हो कि अहिलेको ?”