ओलीको बेइमानीको हिसाब ३० गते हुन्छ : प्रचण्ड

सर्लाही- ओलीको बेइमानीको हिसाबकिताब जनताले वैशाख ३० गते गर्ने नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले बताएका छन् ।

स्थानीय निर्वाचनमा गठबन्धन र आफ्ना उम्मेदवारका लागि मत माग्न सर्लाहीको लालबन्दी आइपुगेका छन् । केपी ओलीको भ्रम र झूटको खेतीको एकएक हिसाब गर्न अब केही दिन मात्र बाँकी रहेको प्रचण्डले बताएका छन् ।

उनले नेकपा माओवादी केन्द्र लालबन्दी नगर समितिले आयोजना गरेको चुनावी सभालाई सम्बोधन गर्दै संघीयता, लोकतन्त्र विरोधी तथा प्रतिगामी शक्तिलाई परास्त गर्न गठबन्धनका उम्मेदवारहरूलाई विजयी गराउन आग्रह गरेका छन् ।

स्थानीय तहको निर्वाचनले संघीयताविरोधी तत्त्वलाई पाखा लगाएर संघीय लोकतान्त्रिक गणतन्त्रलाई मजबुत बनाउने अध्यक्ष प्रचण्डले बताएका छन् । उनले नेकपा एमालेलगायत केही पार्टीलाई संघीय लोकतान्त्रिक गणतन्त्र मन नपरेको भन्दै यसका विरुद्ध विभिन्न षड्यन्त्र गरेर संविधान र व्यवस्थालाई उल्टाउन खोजिरहेको आरोप समेत लगाएका छन् ।

उनले लोकतन्त्रबाट जनताका उपलब्ध अधिकार रक्षाका निम्ति लालबन्दी नगरपालिकामा गठबन्धनबाट माओवादी केन्द्रका मेयर पदका उम्मेदवार प्रह्लाद बुढाथोकी र एकीकृत समाजवादीबाट उपमेयरका उम्मेदवार गोविन्द अधिकारी लगायत सम्पूर्ण उम्मेदवारलाई मत दिन आग्रह गरेका छन् ।

आजै अध्यक्ष प्रचण्डले चक्रघट्टा र धनकौल गाउँपालिकामा पनि चुनावी सभालाई सम्बोधन गरेका थिए ।