वैशाख ३० मै स्थानीय तहको चुनाव हुन्छ : प्रचण्ड

काठमाडौं- समस्या परेका पालिकामा सत्ता गठबन्धनभित्रै मित्रतापूर्ण प्रतिस्पर्धा गर्न सकिने नेकपा माओवादी केन्द्रका अध्यक्ष पुष्पकमल दाहाल प्रचण्डले बताएका छन् । आज बिहीबार चुनावी अभियानका क्रममा धनगढी पुगेका प्रचण्डले पत्रकारहरूसँग भने, “कहीँकतै (पालिकामा) गठबन्धनभित्र त्यस्तो समस्या पर्‍यो भने गठबन्धनभित्र स्वस्थ र मित्रतापूर्ण प्रतिस्पर्धाको ठाउँ पनि हामीले बाँकी राखेका छौँ।”

उनले यद्यपि ६ महानगरपालिका र ११ उपमहागरपालिकामा गरिएको तालमेलका आधारमा नै अन्य पालिकामा गठबन्धनभित्र तालमेल हुने बताएका छन् ।

उनले थप भने, “जसरी केन्द्रमा महानगर र उपमहानगरपालिकामा सहमतिका आधारमा तालमेल गरेका छौँ । त्यही मर्म र भावनालाई आत्मसात गरेर तालमेल र गठबन्धन गर्ने भनेर भनेका छौँ। समस्या परेमा त्यस्तो ठाउँमा गठबन्धनभित्रै पनि प्रतिस्पर्धा हुन सक्छ भनेका छौँ। तर, त्यस्तो भन्नुको तात्पर्य गठबन्धनभित्रको प्रतिस्पर्धामा प्राथमिकता दिने भनिएको होइन। प्राथमिताकता तालमेलमा हो । तर, समस्या कहिँकतै पर्‍यो भने समस्या परेको ठाउँमा मित्रतापूर्ण प्रतिस्पर्धा गर्न सकिन्छ भन्ने कुरा नै हो।”

गठबन्धन अब चुनावी तयारीमा होमिएको बताए। केही समय अघिसम्म चुनाव सार्ने हल्ला फैलाइए पनि अब निर्धारित समयमै चुनाव हुने स्पष्ट भएको प्रचण्डको भनाइ थियो।

प्रचण्डले भने, “कतिपयले चुनाव सर्छ भनेर ‘कन्फुज’ पार्न खोजेका थिए। मैले त्यति बेला पनि गठबन्धनमा आवद्ध दल र सरकार सम्पूर्ण दृढताका साथ चुनावमा गइसकेको भनेको थिएँ । अब त थप स्पष्ट भएको छ। वैशाख ३० मै स्थानीय तहको चुनाव हुन्छ।”