सुजाताको हत्या आरोपी सार्वजनिक

पाँचथर-पाँचथरको गोपेटार स्थित एनएमबि माइक्रोफाइनान्सकी कर्मचारी सुजाता तामाङको हत्या आरोपीलाई पाँचथर प्रहरीले शुक्रवार सार्वजनिक गरेको छ ।

पाँचथर हिलिहाङ ६ भारपाका १९ वर्षीय अस्मीन भनिने घनेन्द्र लावतीलाई प्रहरीले पक्राऊ गरी सार्वजनिक गरेको छ ।
प्रहरीले फिदिममा पत्रकार सम्मेलन गर्दै हत्या आरोपी लावतीका साथवाट वरामद गरेको नगद ८१ हजार ७० रुपैंया र हत्यामा प्रयोग भएको खुकुरी पनि सार्वजनिक गरेको हो ।

लावतीले पैसाकै प्रलोभनमा तामाङलाई बाटो ढुकेर गर्धनमा खुकुरी प्रहार गरी हत्या गरेको प्रारम्भिक अनुसन्धानमा खुलेको जिल्ला प्रहरी कार्यालय पाँचथरका प्रहरी नायव उपरिक्षक नरेन्द्र कुँवरले जानकारी दिए ।

हत्या आरोपी लावती घर नजिकैको जंगलमा लुकेर वसेको अवस्थामा खुकरी र नगद सहित पक्राउ परेको पनि प्रहरीले जनाएको छ ।
तामाङलाई असार ३ गते अपरान्ह ४ वजे हिलिहाङ ६ भारपा स्थित सिटे भन्ने स्थानमा हत्या गरिएको अवस्थामा शव फेला परेको थियो ।

इलामको माइ जोगमाइ घर भएकी २१ वर्षीया तामाङ एनएमवि माइक्रोफाइनान्स गोपेटारमा प्रशिक्षार्थी सहायकका रुपमा कार्यरत थिइन ।

मृतकका परिवारलाई बैंकका तर्फवाट राहत

यसैविच एनएमवि माइक्रो फाइनान्सले हत्या गरिएकी कर्मचारी तामाङको परिवारलाई ६ लाख ५० हजार रुपैंया राहत रकम उपलव्ध गराउने भएको छ । माइक्रोफाइनान्सले तामाङको परिवारका एकजना सदस्यलाई रोजगारी दिने सहमति समेत गरेको सहायक महा प्रवन्धक रामचन्द्र मिश्रले जानकारी दिए ।

घोषणा गरेमध्ये १ लाख रुपैंया शुक्रवार घरैमा पुगेर वितरण गरेको पनि मिश्रको भनाई छ । यो वाहेक कर्मचारी परिवारका तर्फवाट यथासक्दो रकम संकलन गरी परिवारलाई उपलव्ध गराउने तयारी भइरहेको पनि मिश्रले जानकारी दिए ।