निर्वाचनमा पराजित भएपछि नैतिकताको आधार राजिनामा दिएको रक्षामन्त्री डा. रिजालको राजीनामा स्वीकृत

काठमाडौँ – कांग्रेसको १४औं महाधिवेशनमा महामन्त्रीको उम्मेदवारी दिएका डा. मीनेन्द्र रिजालले निर्वाचनमा पराजित भएपछि नैतिकताको आधारमा गत पुस १ गते मन्त्री पदबाट रक्षामन्त्री डा. मीनेन्द्र रिजालले मन्त्री पदबाट राजीनामा दिएको स्वीकृत भएको छ ।

राष्ट्रपति विद्यादेवी भण्डारीको कार्यालयले सोमबार विज्ञप्ति जारी गरी नेपालको संविधानको धारा ७७ को उपधारा (२) को खण्ड (क) बमोजिम रक्षामन्त्री डा. रिजालले पदबाट राजीनामा दिएकोले प्रधानमन्त्री शेरबहादुर देउवाको सिफारिसमा राष्ट्रपतिले उक्त मन्त्रालयको कार्यभार पनि प्रधानमन्त्री देउवाले नै सम्हाल्ने गरी तोक्नुभएको जानकारी दिएको छ ।

डा. शेखर कोइरालाको प्यानलबाट महामन्त्रीको उम्मेदवार बनेका डा. रिजालले मतगणना शुरु भएको केही घण्टामै पदबाट राजीनामा दिने घोषणा गरेका थिए । महामन्त्रीमा विश्वप्रकाश शर्मा र गगन थापा निर्वाचित भएका थिए भने अन्य उम्मेदवार डा. प्रकाशशरण महत र प्रदीप पौडेल पनि पराजित भएका थिए ।