प्रधानन्यायाधीशलाई राजीनामा दिन आग्रह

काठमाडौं-प्रधानन्यायाधीश चोलेन्द्र शम्शेर जबरालाई बहिर्गमनको बाटो रोज्न चार पूर्वप्रधानन्यायाधीशहरूले आग्रह गरेका छन् ।

सोमबार एक विज्ञप्ति जारी गर्दै पूर्वप्रधानन्यायाधीशहरू मीनबहादुर रायमाझी, अनुपराज शर्मा, कल्याण श्रेष्ठ र सुशीला कार्कीले प्रधानन्यायाधीश जबरालाई बहिर्गमनको बाटो रोज्न आग्रह गरेका हुन् ।

संविधान बमोजिम अदालतहरू र न्यायिक निकायहरूको न्याय प्रशासन कार्य प्रभावकारी बनाउने अन्तिम जिम्मेवारी प्रधान न्यायाधीशको रहनेमा दुई मत नहुने उनीहरूको ठहर छ ।

वर्तमान प्रधानन्यायाधीशको विभिन्न भूमिकालाई लिएर अनेकौं चर्चा परिचर्चा, गुनासो र निन्दा सार्वजनिक भएको बारे आफूहरूको ध्यानाकर्षण भएको उनीहरूले जनाएका छन् ।

विज्ञप्तिमा अहिलेको समस्या प्रधानन्यायाधीश जबरा स्वयंले सिर्जना गरेको भन्दै त्यसको जबाफदेही ग्रहण गर्नु आग्रह गरिएको छ

जनविश्वासलाई नै आफ्नो वैधताको स्रोत मान्ने न्यायपालिकाप्रति आमजनताको विश्वास टुटे देशको संवैधानिक पद्धति र लोकतन्त्र घातक हुन जाने विज्ञप्तिमा उल्लेख गरिएको छ ।