हिरासतमा रहेका साहको मृत्युपछि सुनसरी तनावग्रस्त

काठमाडौँ- अभद्र व्यवहारको कसूरमा पक्राउ परेर हिरासतमा रहेका सुनसरी भोक्राहाका मोहम्मद हकिम साहको मृत्यु भएपछि सुनसरी तनावग्रस्त बनेको छ ।

उनका आफन्त साहको मृत्यु भएपछि जिल्ला प्रहरी कार्यालय सुनसरी परिसरमा प्रदर्शनमा उत्रिएका छन् । प्रदर्शनमा उत्रिएका मृतकका आफन्त र प्रहरीबीच झडप भएको हो ।

प्रहरीसहित करिब एक दर्जन व्यक्ति झडपका क्रममा सामान्य घाइते भएका छन् । स्थिति नियन्त्रणमा लिन प्रहरीले अश्रु ग्याससमेत प्रहार गरेको थियो । हिरासतमा रहेका बेला चरम यातना दिइएका कारण साहको मृत्यु भएको आफन्तको आरोप छ ।

प्रहरीका अनुसार भने साहले आत्महत्या गरेको बताएको छ । साहले आत्महत्या गरेको देखिएको जिल्ला प्रहरी कार्यालय सुनसरीका प्रमुख प्रहरी उपरीक्षक (एसपी) सञ्जयसिंह थापाले बताएका छन् ।

एसपी सिंहका अनुसार सिसीटिभी फुटेजमा समेत साहले आत्महत्या गरेको देखिएको छ ।