कांग्रेस महाधिवेशन : आज काठमाडौँ महानगरपालिकाको मतदान

काठमाडौँ- आज आइतबार बिहान ९ बजेदेखि १ बजेसम्म नेपाली कांग्रेसको १४औं महाधिवेशनअन्तर्गत काठमाडौँ महानगरपालिकाको मतदान हुने भएको छ ।

काठमाडौं कांग्रेस जिल्ला सभापति सबुज बानियाँले यसअघि शनिबार महानगर पदाधिकारीमा सहमति हुन नसकेपछि निर्वाचन आजका लागि सारिएको जानकारी दिएका छन् । महानगरमा पदाधिकारीबाहेकका पदमा सहमति भएको जनाइएको छ ।

अधिवेशनको शनिबार कांग्रेस नेता प्रकाशमान सिंहले उद्घाटन गरेका थिए । देशकै राजधानी रहेका कारण महानगरको अधिवेशनलाई कांग्रेस नेता कार्यकर्ताले चासोका साथ हेरेका छन् ।काठमाडौँ महानगरमा कांग्रेस सभापति शेरबहादुर देउवा र नेता प्रकाशमान सिंह– गगन थापा पक्षबीच प्रतिस्पर्धा हुने भएको छ ।

पार्टी सभापति देउवा पक्षबाट प्रगतिमान रञ्जित र सिंह पक्षबाट निलकाजी शाक्यबीच महानगरको सभापतिमा प्रतिस्पर्धा हुने भएको हो । विगतदेखि काठमाडौँमा तुलनात्मक रुपमा सिंहपक्ष बलियो रहँदै आएको छ । केन्द्रीय सदस्य तथा कृष्णप्रसाद सिटौला पक्षका नेता भीमसेनदास प्रधानको साथ लिएर देउवा पक्षले रञ्जितलाई उठाएको छ ।

३२ वडा मध्ये अधिकांश वडा सभा सभापतिको समर्थन शाक्यलाई रहेको दाबी गरिएको छ ।