बालुवाटार पुगे प्रचण्ड

काठमाडौँ- प्रधानमन्त्री शेरबहादुर देउवालाई भेट्न नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ बालुवाटार पुगेका छन् ।

मन्त्रिपरिषद विस्तारबारे छलफल गर्न प्रचण्ड प्रधानमन्त्री निवास बालुवाटार गएको जनाइएको छ । दुई नेताबीच अहिले छलफल जारी रहेको प्रधानन्त्रीको सचिवालयले जनाएको छ ।

आज मन्त्रीमा जाने नेताहरुको नाम टुंगो लगाउन माओवादी केन्द्रको स्थायी कमिटी बैठक बस्दै छ । बैठक बस्नु अघि प्रचण्डले देउवालाई भेटेका हुन् । गठबन्धनको बैठकमा प्रधानमन्त्री देउवाले पटक पटक मन्त्रीको नाम दिन भने पनि गठबन्धनका शीर्ष नेताहरुले अझै मन्त्रीको नाम दिएका छैनन् ।

गत असार २९ गते प्रधानमन्त्री बनेका देउवाले अझैसम्म पनि मन्त्रिपरिषदलाई पूर्णता दिन सकेका छैनन्।