आजदेखि कमजोर हुँदै मनसुन‚ एक सातासम्म पानी पर्ने सम्भावना

काठमाडौँ- आजदेखि मनसुन केही कमजोर हुँदै गएको जल तथा मौसम विज्ञान विभागको मौसम पूर्वानुमान महाशाखाले जनाएको छ । सामान्यतया सेप्टेम्बर २३ मा सकिनुपर्ने भए पनि यस वर्ष मनसुन केही दिन धकेलिने मौमसविद् मीनकुमार अर्यालले जानकारी दिएका छन् ।

यद्यपि‚ अर्यालले आजदेखि कमजोर हुँदै जाने मनसुन दुई हप्तासम्म सकिने बताएका छन् । स्थानीय वायु र जलवाष्पयुक्त हावाको असरको कारण कम्तीमा पनि अबको एक साता देशका अधिकांश स्थानमा हल्का पानी पर्ने महाशाखाले पूर्वानुमान गरेको छ ।

अर्यालका अनुसार मनसुन कमजोर हुने क्रममा रहे पनि मंगलबार देशभरको मौसम आंशिक बदली भई अधिकांश स्थानमा हल्कादेखि मध्यमम खालको पानी पर्नेछ। बिहान सुदूरपश्चिम र लुम्बिनी प्रदेशमा पानी परिरहेको छ । अन्य स्थानको मौसम बदली भएको छ। दिउँसो देशैभर मेघगर्जन र चट्याङसहित हल्का पानी पर्ने मौसमविद् अर्यालले जानकारी दिए। दिउँसो काठमाडौं उपत्यकामा पनि पानी पर्नेछ। गण्डकी र लुम्बिनी प्रदेशका एक दुई स्थानमा भने भीषण वर्षाको सम्भावना रहेको मौसमविद् अर्यालले बताएका छन् ।

स्थानीय वायु र जलवाष्पयुक्त हावाको प्रभावका कारण सोमबार काठमडौं उपत्यकासहित देशका विभिन्न स्थानमा पानी परेको थियो । सोमबार राति बर्दिया, सुर्खेत र बाग्लुङमा धेरै पानी परेको थियो । काठमाडौं उपत्यकामा पछिल्लो २१ घण्टामा २६ मिलीमिटर वर्षा मापन भएको महाशाखाले जनाएको छ ।