श्रीलांकाले खुलायो भारतसँगको नाका

काठमाडौँ- भारतसँगको सीमा नाका श्रीलंकाले खुला गरेको छ। लामो समयदेखि कोरोनाभाइरसको महामारीका कारण दुई देशबीचको नाका बन्द गरिएको थियो ।

खुला गरिएको नाकाबाट पूर्ण खोप लगाएका र कोरोना नेगेटिभ भएको पीसीआर रिपोर्ट भएका व्यक्तिलाई मात्रै आवतजावत गर्न दिइने भएको छ । सरकारी अधिकारीहरुले यात्रुले पीसीआर रिपोर्ट ७२ घण्टा भित्रको मात्रै देखाउनुपर्ने व्यवस्था गरिएको जानकारी दिएका छन् ।

सरकारी अधिकारीले जारी गरेको वक्तव्यका अनुसार श्रीलंकाबाट भारतको चेन्नाइ, मुम्बई, बैंलोरलगायत क्षेत्रमा हवाई उडानसमेत सुरु हुनेछ । त्यसका लागि उडान तालिकासमेत बनिसकेको उनीहरुले जनाएका छन् ।

स्वास्थ्य सुरक्षाको अवस्था, माग, आवश्यकतालगायत आधारमा आवतजावतको तालिका थप विस्तार पनि हुने वक्तव्यमा उल्लेख गरिएको छ । श्रीलंकन एयरलाइन्ससहित विभिन्न विमान सेवा प्रदायक कम्पनीले यात्रुका लागि सहुलियत तथा आकर्षक प्याकेज पनि घोषणा गरेको छ ।

श्रीलंकाबाट भारत जानेभन्दा पनि भारतबाट श्रीलंका आउनका लागि प्रेरित गर्न खोजिएको र यसले विस्तारै देशको पर्यटन, व्यापार, व्यवसायलाई पुनःउत्थान गर्न सजिलो बनाउने धेरैले विश्वास लिएका छन् ।

अधिकारीहरुले श्रीलंका आएकालाई देशको जुनसुकै ठाउँ पनि जान सकिने व्यवस्था गरिएको तर स्वास्थ्य मापदण्ड भने कडाइका साथ पालना गर्नुपर्ने सर्त भने राखिएको जानकारी दिएका छन् ।

श्रीलंकामा अहिलेसम्म चार लाख १६ हजार ९६१ जना कोरोनाभाइरसबाट संक्र्रमित भएका छन् । तीमध्ये आठ हजार ३७१ जनाको मृत्यु भएको छ ।