कुनै हालतमा माओवादीसँग एकता गर्नु हुँदैन : वामदेव गौतम

काठमाडौँ- नेकपा एमालेका उपाध्यक्ष वामदेव गौतमले नेकपा (माओवादी केन्द्र) सँग कुनै पनि हालतमा एकता गर्न नहुने बताएका छन् ।

प्राइम टेलिभिजनमा ऋषि धमलासँगको अन्तरवार्तामा नेता गौतमले एमालेले माओवादीसँग एकता गर्न नहुने तर्क राखेका हुन् । माओवादी केन्द्रसँग १७ हजार जनताको रगतमा टेकेर बनेको ऐतिहासिक पृष्ठभूमि रहेको र एमाले संसदीय संघर्षको पृष्ठभूमिबाट बनेको भन्दै एकता सम्भव नभएको उनले दाबी गरेका छन् ।

माओवादी र एमालेबीच एकता हुँदा आधा-आधा कार्यकाल प्रधानमन्त्री हुने कुनै सम्झौता नगरेकाे पनि उनले बताए। गौतमले केपी शर्मा ओली, पुष्पकमल दाहाल ‘प्रचण्ड’ र नारायणकाजी श्रेष्ठले बालुवाटारमा मध्यरातमा कार्यकाल आधा-आधा बाँड्ने सम्झौता गरेर आफूहरूलाई सुनाएकाे मात्रै बताएका छन् ।

आफूलाई एकताको जिम्मा दिए ओली र नेपाललाई मिलाएरै छाड्ने उनले दाबी गरे । गौतमले आफूलाई हराउन केपी शर्मा ओली नै लागिपरेको बताएका छन्।
प्रधानमन्त्रीको उम्मेदवार भनेर बर्दियाका जनताले प्रचार गरेकै कारण आफूलाई ओलीको नेतृत्वले नै हराएको पनि गौतमले दाबी गरे ।

एमालेबाट विभाजित भइ नेकपा (एकीकृत समाजवादी) पार्टी गठन गरेका माधवकुमार नेपालले सहकार्यबारे आफूसँग सांगठनिक हैसियतले प्रस्ताव नगरेको पनि उनले बताए । अब नेपाल नेतृत्वको पार्टीमा प्रवेश गरी सरकारमा सहभागी हुने कुनै सम्भावना नभएको उनको भनाइ छ ।