चीनबाट आइपुग्याे आठ लाख डाेज खाेप

काठमाडौँ- चीनबाट आठ लाख डोज भेरोसेल खोप आइपुगको छ । बुधबार हिजोराति १२ बजे चीनसँग खरीद गरिएको ६० लाख डोज खोपमध्ये ८ लाख खोप नेपाल आइपुगको हो । त्यस्तै भाेलि थप आठ लाख डोज भेरोसेल खोप नेपाल आउने बताइएकाे छ ।

व्यवस्थापन महाशाखाका फार्मेसी अधिकृत बडेबाबु थापाले भने, “खोप राति १२ बजे आइपुग्यो, अहिले खोप टेकु र केही विमानस्थलकै भण्डारण केन्द्रमा राख्ने तयारी भइरहेको छ ।”

नेपालले चीनसँग यसअघि ४० लाख डोज भेरोसेल खोप खरिद गरिसकेको छ । बाँकी ४४ लाख डोज खोप अगस्टको अन्तिम साता आइपुग्ने स्वास्थ्य सेवा विभाग, व्यवस्थापन महाशाखाले जनाएको छ ।

यस्तै, जापानले कोभ्याक्स मार्फत उपलब्ध गराएको १६ लाख डोज खोपमध्ये बाँकी ७ लाख डोज खोप भदौ ५ र ७ गते आउने भएको छ ।

नेपालमा अहिलेसम्म २४ लाख ४८ हजार कोभिसिल्ड, ५८ लाख डोज भेरोसेल, १६ लाख डोज जोन्सन एन्ड जोन्सन, १० लाख ७७ हजार ३२० डोज एस्ट्राजेनेका गरी १ करोड ८ आठ लाख ६० हजार १७० डोज खोप आइसकेको छ ।

स्वास्थ्य तथा जनसंख्या मन्त्रालयको मंगलबारको तथ्यांक अनुसार ३५ लाख ८६ हजार ६७३ जनाले कोभिडविरुद्धको पूर्ण खोप लगाएका छन् भने ४७ हजार ६४ हजार ८५६ जनाले पहिलो मात्रा लगाएका छन् ।