सवारी दुर्घटनामा चारजनाको मृत्यु, १४ घाइते

काठमाडौँ- देशका विभिन्न स्थानमा भएका सावरी दुर्घटनामा ४ जनाको मृत्यु भएको छ भने १४ जना घाइते भएका छन् ।

धादिङको गल्छी गाउँपालिका ६ बैरेनीमा गएराती बस र ट्रक आपसमा ठोक्किँदा एक युवतीको मृत्यु भएको छ । त्यस्तै १२ जना घाइते भएका छन् । मृत्यु हुनेमा सोलुखुम्बुको महाकुलुङ गाउँपालिका ३ की २७ वर्षीया रेनुका कुलुङ रहेकी छिन् ।

प्रहरीले राष्ट्रिय ट्रमा सेन्टरमा उपचारको क्रममा उनको आज बिहान करिब सवा ४ बजे उनको मृत्यु भएको जनाएको छ । बा ३ ख ४०१४ नम्बरको बस र भारतीय नम्बरको ट्रक गएराति २ बजे आपसमा ठोकिएका थिए ।

यस्तै झापाको बाह्रदशी गाउँपालिका ७ सिमल चोक नजिकै गएराति कारको ठक्करबाट स्कुटरमा सवार एक जनाको मृत्यु भएको छ । प्रदेश १, ०१–०१२ प १९४२ नम्बरको स्कुटरलाई प्रदेश १, ०१–००१ च ७२७७ नम्बरको कारले ठक्कर दिएको थियो । कारको ठक्करबाट घाइते भएका स्कुटर चालक स्थानीय २८ वर्षीया प्रमिता कार्की र सोही ठाँउकी ३२ वर्षीया सरस्वती मगरलाई उपचारको लागि वि.एण्ड. सी अस्पताल विर्तामोड पठाइएको थियो। उपचारकै क्रममा सरस्वतीको मृत्यु भएको झापा प्रहरीले जनाएको छ ।

सुनसरीको इटहरी उपमहानगरपालिका १३ काली मन्दिर चोकमा हिजो साँझ ट्रकको ठक्करबाट पैदलयात्रीको मृत्यु भएको छ । मृत्यु हुनेमा मोरङको विराटनगर महानगरपालिका ६ की ६० वर्षिया भुल्कीदेवी कामत रहेकी छिन् । ना ४ ख ८३७१ नम्बरको ट्रकले उनलाई ठक्कर दिएको थियो । महोत्तरीको गौशाला नगरपालिका १ रामनगरमा हिजो बेलेकी कारको ठक्करबाट पैदलयात्री रामपुकार महतो रहेको मृत्यु भएको छ। बा ६ च ४६१७ नम्बरको कारले पैदलयात्री महतोलाई हिजो बेलुकी ८ बजे ठक्कर दिएको हो ।

ठक्कर दिने कारका चालकलाई नियन्त्रणमा लिएको इलाका प्रहरी कार्यालय गौशालाले जानकारी दिएको छ ।