हाइटीमा शक्तिशाली भूकम्प, ३०४ को मृत्यु

काठमाडौँ- शनिबार क्यारेबियन मुलुक हाइटीमा गएको शक्तिशाली भूकम्पमा परी मृत्यु हुनेको संख्या ३०४ पुगेको छ । त्यस्तै घटनामा परी १८०० सयभन्दा बढी मानिस घाइते भएका छन् ।

७ दशमलब २ म्याग्निच्युडको शक्तिशाली भूकम्पका कारण हाइटीमा ठूलो क्षति भएको हो । भूकम्पका कारण घर, होटेल र चर्चहरु भत्किएका छन् । भूकम्पको केन्द्रबिन्दु भने घना बस्ती भएको राजधानी, मध्य पोर्ट-अ-प्रिन्सबाट १६० किलोमिटर टाढा रहेको बताइएको छ ।

प्रकोपले ग्रस्त क्यारेबियन राष्ट्र हाइटीको पश्चिममा भूकम्पपछि सुनामी आउनसक्ने भन्दै हजारौँ मानिसलाई समुद्र किनारबाट टाढा तथा अग्लो सुरक्षित स्थलतर्फ जान आग्रह गरिएको छ । यस पहिले हाइटीमा सन् २०१० को जनवरीमा गएको ७।० रेक्टर स्केलको भूकम्पले पोर्ट-अ-प्रिन्स र नजिकैका अधिकांश शहरहरूमा ठूलो क्षति भएको थियो ।

उक्त भूकम्पमा परी कम्तीमा दुई लाखभन्दा बढी मानिसको ज्यान गुमेको थियो । तीन लाखभन्दा बढी घाइते भएका उक्त घटनामा साढे एक लाखभन्दा बढी हाईटीबासी घरबारविहीन भएका थिए ।