कुलमान घिसिङ विद्युत् प्राधिकरणको कार्यकारी निर्देशकमा नियुक्त

काठमाडौँ- नेपाल विद्युत् प्राधिकरणको कार्यकारी निर्देशकमा सरकारले कुलमान घिसिङलाई नियुक्त गर्ने निर्णय गरेको छ । सोमबारको मन्त्रिपरिषद् बैठकले घिसिङलाई कार्यकारी निर्देशकमा नियुक्त गर्ने निर्णय गरेको हो ।

ऊर्जा, जलस्रोत तथा सिँचाइमन्त्री पम्फा भुसालले मन्त्रिपरिषद्‍मा यससम्बन्धी प्रस्ताव लगेकी थिइन् । प्राधिकरणका कार्यकारी निर्देशक हितेन्द्रदेव शाक्यलाई भने जल तथा ऊर्जा आयोगमा सरुवा गरिएको बताइएको छ । मन्त्रिपरिषद्को उक्त निर्णय हालसम्म गोप्य राखिएको छ।

मन्त्रिपरिषद्‍बाट निर्णय भए पनि घिसिङले नियुक्तिपत्र पाएका छैनन् । उनलाई आज (बुधाबार) पदबहाली गराउने तयारी रहेको बताइएको छ ।

यसअघि प्रधानमन्त्री देउवाले प्राधिकरणको प्रमुखमा घिसिङलाई नियुक्त गर्न ऊर्जामन्त्री पम्फा भुसाललाई निर्देशन दिएको समाचार बाहिर आएको थियो । उक्त निर्देशनपछि घिसिङलाई नियुक्त गर्ने प्रक्रिया समेत सुरु भइसकेको ऊर्जा मन्त्रालयले जनाएको छ ।