देशभर बढ्दै कोरोना संक्रमण दर, स्वास्थ्यका पूर्वाधारले धान्न गाह्रो हुने

काठमाडौँ- कोरोना संक्रमण बढिरहेको स्वास्थ्य तथा जनसंख्या मन्त्रालयले जनाएको छ । बुधबारको प्रेस ब्रिफिङमा बोल्दै कोरोना संक्रमणको दर बढ्दै गएकाले अस्पतालहरुमा शय्या अभावको अवस्था फेरि आउनसक्ने मन्त्रालयका सहप्रवक्ता डा समिरकुमार अधिकारीले बताएका छन् ।

अधिकारीले संक्रमण बढ्दै गएमा स्वास्थ्यका पूर्वाधारले धान्न गाह्रो हुने र अस्पतालका शय्या व्यवस्थापन गर्न पनि समस्या हुनसक्ने बताएका छन् ।

कोरोना संक्रमणको अवस्थामा कमी ल्याउन अनिवार्य रुपमा मास्कको प्रयोग गर्ने, एक व्यक्ति अर्को व्यक्तिबाट कम्तिमा २ मिटर टाढा बस्ने र बेलाबेलामा साबुनपानीले हात धुन अनिवार्य रहेको डा अधिकारीले जानकारी दिएका छन् । साउन लागेपछि कोरोना संक्रमणको दर बढ्दै गएको भन्दै उनले संक्रमण समुदायमा फैलन नदिन संक्रमित पहिचान छिट्टै गरी उनीहरुलाई आइसोलेसनमा राख्न जरुरी रहेको पनि बताएका छन् ।

कर्णाली, गण्डकी र प्रदेश १ मा संक्रमण दर उच्च

गत २४ घण्टाको तथ्यांकलाई हेर्दा कुल परीक्षण दरको २६ दशमलब २ प्रतिशतमा संक्रमण पुष्टि भएको डा अधिकारीले जानकारी दिए ।

नेपालमा गत २४ घण्टामा ४ हजार १०७ जनामा कोरोना संक्रमण पुष्टि भएको थियो । ११ हजार ३५४ नमुना पिसिआर विधिबाट परीक्षण गर्दा २ हजार ९७५ जनामा संक्रमण पुष्टि भएको छ भने एन्टिजेन विधिबाट ४ हजार ९४४ नमुना परीक्षण गर्दा एक हजार १३२ नमुना पोजिटिभ आएको थियो। यो दर राष्ट्रिय औषत दरभन्दा धेरै माथि रहेको उनको भनाइ छ ।

यस्तै डा अधिकारीका अनुसार कर्णाली, गण्डकी र प्रदेश १ मा संक्रमण दर उच्च रहेको छ । कर्णाली प्रदेशमा ५७ दशलमब ३ प्रतिशत, गण्डकी प्रदेशमा ४४ प्रतिशत र प्रदेश १ मा ३२ प्रतिशत नमुनामा संक्रमण पुष्टि भएको छ । हाल देशभर ३३ हजार ४६४ जना सक्रिय संक्रमित छन् ।

तीमध्ये ३० हजार २७० जना सक्रिय संक्रमित होम आइसोलेसनमा छन् भने संस्थागत आइसोलेसनमा ३ हजार १९४ जना संक्रमित उपचाररत छन् ।