अफगान रक्षामन्त्रीको आक्रमण, चारजनाको मृत्यु

काठमाडौँ- सशस्त्र समूहले अफगानिस्तानका रक्षा मन्त्रीको घरमा आक्रमण गर्दा चार जनाको ज्यान गएको छ । बिबिसीका अनुसार आक्रमणका बेला रक्षा मन्त्री बिस्मिल्लाह खान मोहम्मदी घरबाहिर थिए ।​

बन्दुकधारीहरूले काबुलको सबैभन्दा सुरक्षित मानिने ग्रिन जोनस्थित रक्षा मन्त्रीको निवासमा कार बम हमला गरेका थिए । साथसाथै उनीहरूले गोली पनि चलाएका थिए ।

बीबीसीले रक्षा मन्त्रीको परिवारका सदस्यहरूलाई सुरक्षित रूपमा उद्धार गरिएको जनाएको छ । उक्त हमलामा संलग्न आक्रमणकारीहरू पनि सुरक्षाकर्मीद्वारा मारिएका जनाइएको छ ।

मुख्य अफगान शहरहरूमा तालिबान विद्रोही र सरकारी फौजबीच लडाइँ जारी रहेको तथा संयुक्त राष्ट्रसङ्घको सुरक्षा परिषद्‌ले तत्कालै हिंसा अन्त्य गर्न आह्वान गरेका बेला उक्त आक्रमण भएको हो । सुरक्षा अधिकारीहरूले घटनामा चार जना मारिएको बताएका छन् ।

अफगानिस्तानको दक्षिणी हेल्मन्ड प्रान्तका सहरमा अफगान फौज र तालिबानबीच भीषण लडाइँ जारी छ । संयुक्त राष्ट्रसङ्घले मङगलवार लस्कर गाह सहरमा अघिल्लो दिन मात्र कम्तीमा ४० सर्वसाधारण मारिएको जनाएको छ ।