हाम्रा सांसदलाई झुक्याएर वा प्रलोभनमा पारेर मतदानबाट बाहिर लगियो : केपी ओली

काठमाडौँ- नेता माधवकुमार नेपाल समूहलाई भ्रमबाट मुक्त भएर पार्टीमा फर्किन नेकपा (एमाले)का अध्यक्ष केपी शर्मा ओलीले आग्रह गरेका छन् । उनले पार्टी बिकाउ मालको झुण्ड नभएकाले पार्टी ध्वस्त बनाउन स्वार्थको खेलबाट बाहिर निस्किन आग्रह गरेका हुन् ।

नेता नेपालतर्फ इंगित गर्दै अध्यक्ष ओलीले प्रतिक्रियावादीहरूसँग मिलेर आफ्नै पार्टीका व्यक्तिले साँठगाँठ गरेर सरकार ढलाएको आरोप लगाएका छन् ।

अखिल नेपाल महिला संघको बैठकलाई सम्बोधन गर्दै एमाले अध्यक्ष केपी ओलीले आफ्ना पार्टी फुटाएर अर्को पार्टीलाई सजिलो बनाइदिएको आफू र पार्टीले देखिएरहेको बताएका छन् । उनले भने, “आफ्ना सांसदलाई झुक्याएर वा प्रलोभनमा पारेर मतदानबाट बाहिर लगेको हामीले देखिरहेका छौं । यो लोकतन्त्र, राष्ट्रियता र देशविरोधी अपराध हो । इतिहासले यस्ता खालका अपराधलाई कहिल्यै क्षमा दिँदै।”

यद्यपि, अब पार्टीका नेतालाई गल्ती नगर्न र गल्ती गरे पार्टीले कारबाही गर्ने उनको भनाइ छ । उनले पार्टीविरोधी तत्वहरू अहिलेसम्म पार्टी फुटाउन र सरकार ढाल्न सफल भएको र अहिले देश धेरै अप्ठेरो अवस्थामा पुगेको बताएका छन् । ओलीले पार्टी र देशको पक्षमा उभिन सबैलाई आग्रह गरेका छन् ।