लमजुङमा नियम उल्लंघन गर्ने सवारीसाधनबाट साढे ३४ लाख राजस्व संकलन

लमजुङ- लमजुङमा ट्राफिक नियम उल्लंघन गर्ने सवारीसाधनबाट ३४ लाख ५५ हजार रुपैयाँ राजस्व संकलन भएको छ ।

ट्राफिक प्रहरी प्रमुख लमजुङका प्रहरी नायब निरीक्षक महेन्द्र रानाभाटले गत आर्थिक वर्षमा पाँच हजार ४७६ वटा सवारीसाधन कारवाहीमा परेको र त्यसबापत उक्त रकम संकलन भएको जानकारी दिएका छन् ।

२०७७ साउनदेखि २०७८ असार मसान्तसम्ममा ट्राफिक नियम उल्लंघन गरी कारवाहीमा पर्ने सवारी साधानमा सबैभन्दा धेरै दुई पांग्रे सवारीसाधान रहेका रानाभाटले जानकारी दिए । कारवाहीमा परेका दुई हजार ९१ दुई पांग्रे सवारीसाधनबाट १३ लाख ६६ हजार रुपैयाँ राजस्व संकलन भएको छ ।

यस्तै, एक हजार ४२० कार र जिप कारवाहीमा परेका छन् । उक्त कारवाहीमा परेका कार र जिपबाट ८६ हजार राजस्व संकलन भएको छ । ट्राफिक प्रहरीका अनुसार ८९१ ट्रक/ट्रिपर, ७१३ ट्रयाक्टर, ३३६ बस र अन्य २५ सवारीसाधन कारवाहीमा परेका छन् । ट्रक/ट्रिपरबाट ५२ हजार ७००, ट्रयाक्टरबाट चार लाख ८६ हजार ५००, बसबाट एक लाख ९८ हजार र अन्य सवारीसाधनबाट १७ हजार ५०० रुपैयाँ राजस्व संकलन भएको छ ।

यस्तै, सोही अवधिमा मादक पदार्थ सेवन गरी सवारी चलाउने ४९ जना कारवाहीमा परेका छन् । उनीहरुबाट ४९ हजार रुपैयाँ राजस्व संकलन भएको छ । प्रहरीका आर्थिक वर्ष २०७६/७७ मा ट्राफिक कारवाहीबाट ३१ लाख ७२ हजार रुपैयाँ राजस्व संकलन भएको थियो । उक्त अवधिमा चार हजार ८२५ सवारी कारवाहीमा परेका थिए।