एमाले केन्द्रीय कमिटी बैठक बस्दै

काठमाडौँ- आज नेकपा एमालेको केन्द्रीय कमिटी बैठक बस्दैछ ।

पार्टी केन्द्रीय कार्यालयका सचिव शेरबहादुर तामाङले बैठक विहान ११ बजे च्यासलस्थित तुल्सीलाल स्मृति प्रतिष्ठानको भवनमा बस्ने जानकारी दिएका छन् । आजको बैठक विशेषगरी संगठन निर्माण र विधान अधिवेशनका विषयमा छलफल हुने केन्द्रीय सदस्यसमेत रहेका तामाङले बताएका छन् ।

एमाले साउनको अन्तिममा विधान अधिवेशन गर्ने तयारी गरेको छ । हिजो प्रधानमन्त्री शेरबहादुर देउवालाई पार्टी ह्वीप विपरित केही सांसदले विश्वासको मत दिएको विषयमा पनि आजको बैठकमा समीक्षा हुने तामाङले बताएका छन् । हिजो बसेको स्थायी कमिटी बैठकले पार्टीको ह्वीप उल्लंघन गर्नेहरु एमालेमा नरहने निर्णय गरेको थियो । तर सर्वोच्च अदालतले संविधानको धारा ७६ (५) अनुसार प्रधानमन्त्री चयन हुँदा ह्वीप नलाग्ने र पार्टी ह्वीप नजान्नेलाई कारबाही हुन नसक्ने फैसला सुनाइएकाले अरु कारण देखाएर उनीहरुलाई पार्टीबाट निष्काशन गर्ने एमालेको तयारी छ ।

हिजो देउवालाई एमाले अध्यक्ष ओली पक्षका ८ र वरिष्ठ नेता नेपाल पक्षका १४ जना सांसदले विश्वासको मत दिएका थिए । १० जना सांसद मतदानमै सहभागी भएनन् । तामाङका अनुसार भोट हाल्ने र नहालेर बाहिरिनेका विषयमा के गर्ने भन्ने विषयमा पार्टीले निर्णय गर्ने छ ।