ओलीले बोलाए स्थायी कमिटी बैठक, नेपाल पक्ष नजाने

काठमाडौँ- अध्यक्ष केपी शर्मा ओलीले एकपक्षीय ढंगले स्थायी समिति बैठक बोलाएका छन् । शुक्रबार ११ बजे बस्नेगरी महासचिव ईश्वर पोखरेलले अध्यक्ष केपी शर्मा ओलीको निर्देशनमा स्थायी कमिटी बैठक बोलाएका हुन् ।

एमाले केन्द्रीय कार्यालयका सचिव शेरबहादुर तामाङले बैठकमा आउन माधव पक्षका नेताहरुलाई समेत खबर गरिएको जानकारी दिएका छन् । बैठक ललितपुरस्थित तुलसीलाल प्रतिष्ठानमा बस्ने उनले जनाएका छन् । तर असन्तुष्ट माधव पक्षका नेताहरुले एकपक्षीय ढंगले बोलाएको बैठकमा सहभागी हुने सम्भावना नरहेको बताएका छन् ।

माधव पक्षका नेता युवराज ज्ञवालीले भने, “पार्टीभित्र तिक्तता बढेको छ । पहिला अध्यक्ष र वरिष्ठ नेता भेटवार्ता गरेरमात्रै बैठक बोलाउने भनिएकोमा सल्लाह नै नगरी बोलाएको बैठकमा हाम्रो समूह सहभागी हुने सम्भावना छैन।”

यसअघि गत असार २७ गते एमाले विवाद समाधान गर्न गठित कार्यदलले एमाले एकतासम्बन्धी १० बुँदे सुझाव अध्यक्ष ओली र वरिष्ठ नेता माधवकुमार नेपाललाई बुझाएको थियो । कार्यदलले स्थायी कमिटी बैठक बोलाउनुअघि अध्यक्ष ओली र नेपालबीच भेटवार्ता गरेर सहमतिमा बैठक बोलाउन सुझाव दिएको थियो । तर, कार्यदलको सुझाव र एकताको भावना विपरित अध्यक्ष ओलीले असार २८ गते सर्वोच्चको फैसलापछि वरिष्ठ नेता माधवकुमार नेपाललाई गद्दार भन्दै आरोप लगाएका छन् । यसले एमाले एकता थप पेचिलो बन्दै गएको छ ।