देशभरका १८ वटा सडक बाढी पहिरोले अवरुद्ध

काठमाडौँ- बाढी पहिरोले पृथ्वी राजमार्गसहित देशभरका विभिन्न १८ वटा सडक अवरुद्ध भएका छन् ।

सिद्धार्थ राजमार्ग, साँफेबगर मार्तडी कोल्टी, डुम्रे–बेशीशहर, राप्ती राजमार्ग, कर्णाली, खोड्पे–चैनपुर, मध्यपहाडी राजमार्ग, र अरनिको राजमार्ग अवरुद्ध भएको सडक विभागले जानकारी दिएको छ ।

यस्तै मदन भण्डारी राजमार्ग, स्याप्रुवेशी रसुवागढी र महेन्द्र राजमार्ग लगायतका मार्ग अवरुद्ध भएका छन् ।

सडक विभागका अनुसार पहिरो पन्छाएर बाटो खुलाउने प्रयास भईरहेको छ ।

कुल ९४ राष्ट्रिय राजमार्गमध्ये ५२ वटा एकतर्फी रुपमा संचालमा आएका र २७ वटा सडक दुई तर्फी रुपमा नै चलिरहेको विभागले जनाएको छ ।