राष्ट्रपतिलाई चिथोर्ने कम्पिटिसन चल्याछ : प्रधानमन्त्री ओली

काठमाडौँ- विपक्षी गठबन्धनले राष्ट्रपति विद्यादेवी भण्डारीविरुद्ध दिएको अभिव्यक्तिप्रति प्रधानमन्त्री केपी शर्मा ओलीले आक्रोश व्यक्त गरेका छन् ।

उनले आफ्नै सरकारी निवास बालुवाटारमा परराष्ट्र मामिला अध्ययन प्रतिष्ठानले आयोजना गरेको कार्यक्रममा बोल्दै यसले गणतन्त्र नै संकटमा पर्ने तर्क गरेका हुन् ।

ओलीले भने, “मैले एकपल्ट भनेको थिएँ, रिसाएको बिरालोले खामो चिथोर्छ भनेर, अहिले राष्ट्रपतिलाई चिथोर्ने कम्पिटिसन चल्याछ । जसले राष्ट्रपतिलाई गाली गर्न सक्यो, मुख छाड्न सक्यो त्यो ठूलो हुने कम्पिटिसन चलेको छ । हिजो पनि भूतपूर्वहरुको लस्करले मिट द प्रेस गरेको देखेँ, त्यसमा पनि राष्ट्रपतिभन्दा राजै ठूलो भन्नेमा उहाँहरु पुग्नुभयो।”

राष्ट्रपतिलाई हामीले जे अधिकार दिएका छौं त्यसमा सिमित हुनुपर्ने र त्यसैमा सिमित रहेको उनले दाबी पनि गरेका छन् ।

उनले भन, “तर मलाई उहाँहरुका सम्बन्धमा केही भन्नु छैन, यो आ-आफ्नो कल्चरल लेबलको कुरा होला । अर्को कुरा गणतन्त्रप्रतिको वैरभाव पनि होला भित्री रुपमा।”

विपक्षी गठबन्धनका नेताहरु असभ्य र अमर्यादित समाज निर्माणतर्फ लागेको ओलीको आरोप छ ।