बाढीले सयौं घर डुवानमा, दर्जनौं बेपत्ता

काठमाडौँ- मंगलबार राति आएको भीषण वर्षाले सिन्धुपाल्चोकको नदीहरुमा आउँदा तटीक्षका सयौं घर डुबानमा परेका छन् भने दर्जनौं बेपत्ता भएका छन् । सामाजिक संजाल फेसबुकमार्फत मेलम्ची र इन्द्रावती नदीमा आएको भीषण बाढीले ५० औं जना बेपत्ता भएको स्वास्थ्य तथा जनसंख्या मन्त्री शेरबहादुर तामाङले जानकारी दिएका छन् ।

उनले बाढीले मेलम्ची खानेपानीको ड्याम समाप्त गरेको, तिम्बु बजार, चनौटे बजार, तालामाराङ बजार, मेलम्ची बजार क्षतविक्षत बनाएको जानकारी दिएका छन् । यसैगरी नाकोते पूल, तिम्बु पूल, फट्टे पूल, मेलम्ची पूल, बाहुनेपाटी पूल, ढाँडखोला पूल सम्पूर्ण उडाएको छ ।

स्वास्थ्य तथा जनसंख्या मन्त्री शेरबहादुर तामाङले नदी किनाराका सम्पूर्ण संरचना ध्वस्त बनाएर अरबौंको क्षति पूर्याएको समेत बताएका छन् ।

बाढीपछि जमेका बालुवायुक्त माटोले घरका दोस्रो तलासम्म ढाकेको छ । प्रहरीले कम्तीमा १० जना सम्पर्कविहीन भएको जनाएको छ ।

सुरक्षा निकायका तीन वटै निकायले मंगलबार मात्रै विपद्बाट जुध्नका लागि सम्पूर्ण तयारी पूरा भएको जानकारी दिएकै दिन सिन्धुपाल्चोकमा आएको विपद् र त्यसको उद्दारमा भएको कठिनाइले भने अझै तयारी नपुगेको स्पष्टै देखाएको छ ।