सभामुख सापकोटाले बोलाए शीर्ष नेताको बैठक, प्रधानमन्त्री नजाने

काठमाडौँ- आज प्रतिनिधिसभामा प्रतिनिधित्व गर्ने दलका शिर्ष नेताहरुको बैठक सभामुख अग्नीप्रसाद सापकोटाले आव्हान गरेका छन् ।

शिर्ष दलहरुको बैठकमा प्रधानमन्त्री केपी ओलीलाई समेत बोलाइएको सभामुखको सचिवालयले जनाएको छ ।

बैठक आज अपरान्ह संघीय संसद भवन नयाँ बानेश्वरमा तय गरिएको छ ।

जेठ ८ मा सरकारको सिफारिसमा राष्ट्रपति विद्यादेवी भण्डारीले प्रतिनिधिसभा विघटन गरी कार्तिक २६ र मसिर ३ गतेको लागि चुनावको मिति तय गरेपछि सापकोटाले आगामी कदम बारेमा परामर्श लिन यसअघि पूर्वसभामुखहरु कानुन व्यवासयी एवं राजनीतिक दलका नेताहरुसंग छुट्टाछुट्टै भेट गरेका थिए ।

प्रधानमन्त्री केपी शर्मा ओली भने सर्वदलीय बैठकमा नजाने भएका छन् । प्रेस सल्लाहकार सूर्य थापाले बैठकमा प्रधानमन्त्री ओलीलाई बोलाइएको भए पनि उनी नजाने जानकारी दिए।

सल्लाहकार थापाले भने, “प्रधानमन्त्रीको नाममा पार्टी कार्यालयमा पत्र पुगेको रहेछ । प्रधानमन्त्रीको कार्यालय सिंहदरबार हो । प्रधानमन्त्रीलाई पत्र पठाउने त्यसरी होइन । भेटेर छलफल गर्ने हो । यसरी बोलाएको बैठकमा उहाँ सहभागी हुनुहुन्न।”