बाँकेमा थप तीन संक्रमितको मृत्यु

बाँके- कोरोना संक्रमित थप तीन जनाको बाँकेका अस्पतालमा मृत्यु भएको छ।

अस्पतालले संक्रमित बिरामीहरूको उपचार भैरहेको बाँकेको नेपालगञ्‍जस्थित भेरी अस्पतालमा तीनजना संक्रमित बिरामीको उपचारका क्रममा मृत्यु भएको पुष्टि गरेको छ।

मृत्यु हुनेहरूमा बढैयाताल गाउँपालिका–६ बर्दियाका ४२ वर्षीय पुरुष, बढैयाताल–२ का ४५ वर्षीया महिला र टिकापुर नगरपालिका–८ का ७७ वर्षीय पुरुष रहेका जिल्लाका कोरोना फोकलपर्सन तेज ओलीले बताएका छन् ।

यो सँगै बाँकेमा उपचारका लागि जिल्ला बाहिरबाट आएका २९० जना र जिल्लाकै २९३ जनाको मृत्यु भइसकेको छ । बाँकेमा अहिले संक्रमण दरसँगै मृत्युदर पनि घटिरहेको छ । जिल्लाका भन्दा जिल्ला बाहिरबाट संक्रमित बिरामीहरू उपचारका लागि अहिले बढि आइरहेका छन् ।

स्थानीय प्रशासनले संक्रमण जोखिम कायमै रहेको भन्दै निषेधाज्ञा जारी राखेको छ । निषेधाज्ञा जारी रहेपनि बजारमा चहलपहल भने दिन प्रतिदिन बढिरहेको छ ।

चिकित्सकहरूले संक्रमण दर कम भएपनि स्वास्थ्य सुरक्षाका मापदण्ड कडाइका साथ पालना गर्न आग्रह गरेका छन्‌।