काठमाडौंमा निषेधाज्ञा खुकुलो पार्ने तयारी

काठमाडौं- काठमाडौं उपत्यकामा कडाइपूर्वक लागू गरिएको निषेधाज्ञा केही खुकुलो पार्ने तयारी भएको छ ।

काठमाडौंका सहायक प्रमुख जिल्ला अधिकारी उमाकान्त अधिकारीले जिल्ला प्रशासन कार्यालय काठमाडौं, भक्तपुर र ललितपुरका प्रमुख अधिकारीहरूबीच यसबारे छलफल भइरहेकाे जानकारी दिएका छन् । उनले निषेधाज्ञा भने एक साता थप्नेगरी छलफल भएको बताए।

उनले भने, “अझै कोरोना जोखिम छ। संक्रमणदर केही घटेपनि मृत्युदर घट्न सकेको छैन, त्यसैले एक साता निषेधाज्ञा थप्ने विषयमा छलफल भएको छ, निषेधाज्ञा थपिएपनि खाद्यान्न पसल खोल्न दिनेलगायत केही क्षेत्रमा सहजीकरण गर्ने भन्ने कुरा भएको छ, निर्णय भने बैठकमार्फत नै गरिनुपर्छ।”

गत शनिबार तीनवटै जिल्ला प्रशासन कार्यालयका अधिकारीहरूको बैठकले १४ गतेबाट निषेधाज्ञामा कडाइ गरेको थियो ।

अहिले खाद्यान्न पसल समेत खोल्न दिइएको छैन । सार्वजनिक र इन्टरनेट सेवा प्रदायकको गाडी समेत दिउँसोको समयमा चलाउन रोक लगाएको छ। जारी निषेधाज्ञा २० गते सकिँदैछ ।