त्रिविका २३ जना कर्मचारीको कोरोना सङ्क्रमणबाट निधन

काडमाडौं- कोरोना भाइरस सङ्क्रमणका कारण त्रिभुवन विश्वविद्यालयले आफ्ना २३ जना प्राध्यापक तथा कर्मचारी गुमाएको जनाएको छ ।

सङ्क्रमणका कारण ११ शिक्षक र १२ कर्मचारीको निधन भएको त्रिविको सूचना तथा जनसम्पर्क महाशाखाका प्रमुख योगेन्द्रप्रसाद दाहालले जानकारी दिएका छन् । सङ्क्रमणका कारणले सहप्राध्यापकद्वय किशोर महर्जन र डाक्टर शेरजङ्ग खड्का, उप-प्राध्यापकमा शङ्कर सुवेदी, विनय प्रसाई, दिपक मैनाली, निमा शेर्पा र उमेश यादव, शिक्षण सहायकमा धर्मेन्द्र महर्जन र डोलबहादुर भण्डारी तथा आंशिक शिक्षकमा मनोज चौरसिया र नविन कर्णको निधन भएको छ ।

अहिलेसम्म त्रिविले ६१६ जना शिक्षक, कर्मचारी सङ्क्रमित भएको जनाएको छ । त्रिविले सङ्क्रमणको दोस्रो लहर शुरु भएपछि सबै परीक्षा स्थगन गरेको छ । महाशाखा प्रमुख दाहालले सङ्क्रमणका कारण त्रिविका ७९ शिक्षण इकाइले पूर्ण रुपमा र ३० वटा निकायले आंशिक रुपमा अनलाइन कक्षा सञ्चालन गरिरहेको जानकारी दिएका छन् ।