ओलीले एमाले स्थायी कमिटीको आकस्मिक बैठक डाके

काठमाडौं- प्रधानमन्त्री एवम्‌ नेकपा (एमाले) का अध्यक्ष केपी शर्मा ओलीले पार्टी स्थायी कमिटीको आकस्मिक बैठक डाकेका छन्‌ ।

ओलीले अपराह्न ४ बजे बस्नेगरी प्रधानमन्त्री निवास बालुवाटारमै बैठक डाकेका हुन्‌ ।

ओलीले ​बैठकमा माधकुमार नेपाल समूहका नेता/कार्यकर्तामाथि कारबाही गर्नसक्ने आशंका गरिएको छ ।

बैठकमा मध्यावधि निर्वाचन, विकसित राजनीतिक परिस्थिति र दलको आन्तरिक जीवन विषयमा छलफल हुने एमालेका पार्टी कार्यालय सचिव शेरबहादुर तामाङले बताएका छन्‌ ।

राष्ट्रपति विद्यादेवी भण्डारीले सरकारका सिफारिसअनुसार गएराति प्रतिनिधि सभा विघटन गर्दै आगामी कात्तिक २६ र मङ्सिर ३ गते मध्यावधि निर्वाचन मिति तोकेकी छिन्‌ ।

​नेपाल पक्षले भने संसद्‌ विघटन कदमको विरोध गर्दै विपक्षी दलहरूको गठबन्धनसँग मिलेर आगामी रणनीति बनाउन खोजेको छ ।