भक्तपुरमा ४,३७३ सक्रिय संक्रमित, मृत्यु संख्या २१३

भक्तपुर- भक्तपुरमा हाल ४ हजार ३७३ सक्रिय संक्रमित रहेका छन् । कुल संक्रमितमध्ये १३६ पुरुष र १०३ महिला गरी २३९ जना अस्पताल र आइसोलेसन केन्द्रमा उपचाररत छन् भने २ हजार १६३ पुरुष र १ हजार ९७१ महिला गरी कुल ४ हजार १३४ जना होम आइसोलेसनमा छन् ।

त्येस्तै, भक्तपुरमा कोरोना संक्रमणका कारण मृत्यु हुनेको संख्या १४२ पुरुष र ७१ महिला गरी २१३ पुगेको छ।

सबैभन्दा धेरै मध्यपुर थिमि नगरपालिकामा ७९ जना कोरोना संक्रमितको मृत्यु भएको छ । स्वास्थ्य कार्यालयका अनुसार यहाँ ५६ पुरुष र २३ महिलाको मृत्यु भएको छ। त्यसैगरी भक्तपुर नगरपालिकामा ३५ पुरुष र २३ महिला गरी ५८ जनाको मृत्यु भएको छ ।

स्वास्थ्य कार्यालय प्रमुख कृष्णबहादुर मिजारले त्यस्तै सूर्यविनायक नगरपालिकामा ३५ पुरुष र १८ महिला गरी ५६ जनाको मृत्यु भएको जानकारी दिए । चाँगुनारायण नगरपालिकामा हालसम्म २३ संक्रमितको मृत्यु भएको मिजारले बताए। यहाँ मृत्यु हुनेमा १६ पुरुष र ७ महिला छन् ।

भक्तपुरमा कोरोना संक्रमितहरुमध्ये ७४ प्रतिशत संक्रमणमुक्त भएका छन् । कुल १७ हजार ५७६ संक्रमितमध्ये १२ हजार ९९० संक्रमणमुक्त भएका छन् । जुन ७३ दशमलव ९० प्रतिशत हो। संक्रमणमुक्त भएकाहरुमध्ये ७ हजार २३६ पुरुष र ५ हजार ७५४ महिला छन् ।