विकास र आधुनिकीकरणमा नेपाल एक कदम अगाडि : प्रधानमन्त्री

काठमाडौं- प्रधानमन्त्री केपी शर्मा ओलीले विकास र आधुनिकीकरणको बाटोमा नेपाल एक कदम अघि बढेको बताएका छन् ।

नेपालको अहिलेसम्मको सबैभन्दा ठूलो ३ हजार सिट क्षमताको गोदावरी सनराइज सम्मेलन केन्द्रको शुक्रबार उद्घाटन गर्दै प्रधानमन्त्री ओलीले कतिपय मानिसले केही पनि काम भएन भनिरहेको बेला लगातार निर्माणका काम भई उद्घाटनका काम भइरहेको बताएका हुन् ।

यो देखेर केही मानिसहरु आत्तिएको उनले बताए । ‘कुनै विषय नपाए पछि केही मानिसले धरहरा तयार नहुँदै उद्घाटन गर्यो भने’, प्रधानमन्त्रीले भने ।

यसमा पनि त्यसो भन्न सक्ने बताउँदै उनले कसैको आदत नै नकारात्मक टिप्पणी गर्ने हुने बताए । त्यस्ता मानिसको पछि नलाग्न उनले आग्रह गरे ।

तयारी भन्दाछिटो कोभिड बढेकोले तिब्र तयारीमा सरकार जुटिरहेको उनले बताए । ‘मानिसहरुको ज्यान गइरहेको छ, यो बहुत दुःखको कुरा हो, यो ज्यान बचाउने कुरालाई सबैभन्दा महत्वपूर्ण विषय बनाएर सरकार हिँडिरहेको छ’, प्रधानमन्त्रीले भने ।