संसद अधिवेशन सुरु हुँदै, प्रधानमन्‍त्रीले विश्‍वासको मत लिने

काठमाडौं- विश्‍वासको मत लिनका लागि प्रधानमन्‍त्री केपी ओलीलाई डाकिएको संसद्को विशेष अधिवेशन एकछिनमा सुरु हुँदैछ । भाग लिन सांसदहरू संसद् भवनमा पुगिसकेका छन् ।

यो बैठकमा विश्‍वासको मत लिने प्रधानमन्‍त्रीको प्रस्तावमाथि मतदान हुनेछ । नेता एमालेका माधव नेपाल पक्षका सांसदहरू अनुपस्थित हुने निर्णय गरेकोले ओलीले विश्‍वासको मत पाउने संभावना छैन । जनता समाजवादी पार्टीको महन्थ ठाकूर र राजेन्द्र महतो समूह तटस्थ बस्‍ने निर्णय गरेको छ भने उपेन्द्र यादव र बाबुराम भट्टराई पक्षले विपक्षमा मतदान गर्ने भएको छ ।

२ सय ७५ सदस्यीय प्रतिनिधिसभामा चार रिक्त रहेकोले हाल २७१ सदस्य कामय छन् । यो अंकगणितअनुसार प्रधानमन्त्रीले विश्‍वासको मत लिन १ सय ३६ सांसदको समर्थन चाहिन्छ । अहिले संसदमा एमालेका १२१, कांग्रेसका ६१, माओवादी केन्द्रका ४८ र जसपाका ३४ ( २ निलम्बित ) छन्। तीनजना स्वतन्त्र हैसियतमा छन् । नेपाल पक्षमा ३३ जना सांसद रहेका छन् । जसमध्ये प्रत्यक्षतर्फ २३ र समानुपातिकका १० जना सांसद रहेका छन् ।

ओलीले माधव पक्ष अनुपस्थित भएपछि सयभन्दा कम मत पाउने देखिन्छ । माधव पक्षले राजीनामा नदिँदा विश्‍वासको मत लिन आवश्यक पर्ने संख्या घटेको छैन । अहिले अुनपस्थित भए पनि वैकल्पिक सरकार बनाउने बेला राजीनामा दिएर विपक्षी गठबन्धनलाई सघाउने संभावना छ ।

ओलीले विश्‍वासको मतमा फेल भएपछि आजै राजीनामा दिनेछन् । राष्ट्रपतिले ७६ (२) अनुसार बहुमतीय सरकार बनाउन दलहरूलाई आव्‍हान गर्नेछिन् । विश्‍वासको मत नपाए ७६ (३) अनुसार ठूलो दलको नेताको हैसियतले अल्पमतको प्रधानमन्‍त्रीका रुपमा नियुक्तिका लागि राष्ट्रपतिसमक्ष दाबी गर्ने र अल्पमतको प्रधानमन्‍त्रीका रुपमा चुनाव घोषणा गर्ने ओलीको योजना छ । तर राष्ट्रपतिले संसदीय अभ्यासको स्थापित प्रचलन र नजिरअनुसार सिधै ७६ (३) प्रवेश नगरी ७६ (२) अनुसार बहुमतीय सरकार बनाउन दलहरूलाई आग्रह गर्ने तयारीमा छन् ।