नौ बजेको डेडलाइन वेवास्ता गर्दै एमाले अध्यक्ष ओलीको ट्विट : हतारमा अनुचित निर्णय नलिनुस्

काठमाडौं- हतारमा कुनै पनि अनुचित निर्णय नलिन आग्रह प्रधानमन्त्री तथा नेकपा एमालेका अध्यक्ष केपी शर्मा ओलीले गरेका छन् । माधवकुमार नेपाल समूहले आज ९ बजेसम्मका लागि दिएको समयलाई वेवास्ता गरेका ओलीले १०:५५ बजे ट्विट गर्दै समस्या भए सँगै बसेर छलफल तथा समाधान गर्न सकिने बताएका हुन् ।

अध्यक्ष ओली र वरिष्ठ नेता नेपालबिच पार्टी कसले विभाजित गरायो भन्ने देखाउने होडबाजी जारी छ । त्यसैक्रममा ओलीले ट्विट गरेका हुन् । ओलीले ट्विटमा भनेका छन्,”यस्तो अवस्थामा आन्तरिक मतभेद वा असन्तुष्टि केही भए आपसी छलफलबाट समाधान गर्न सकिने नै छ । तसर्थ, हतारोमा कुनै पनि अनुचित निर्णयमा जान वाञ्छनीय नहुने कुरामा म सबै माननीयज्यूहरूको ध्यानाकर्षण गराउन चाहन्छु। आउनुस्, केही समस्या भए सँगै बसौं, छलफल गरौं र समाधान गरौं ।”

उनले थप भनेका छन्, “नेकपा (एमाले) संसदीय दलका सबै माननीय सदस्यहरूलाई अवगत नै छ, प्रधानमन्त्रीले विश्वासको मत लिने प्रयोजनका लागि आज दिनको १ बजेबाट प्रतिनिधिसभाको विशेष अधिवेशन र बैठक बस्दैछ । त्यस प्रयोजनका लागि प्रधानमन्त्रीको पक्षमा मतदान गर्न दलका तर्फबाट जानकारी गराइएको छ।”