कोरोना नियन्त्रणमा छ: प्रधानमन्त्री ओली

काठमाडौं- नेपालमा कोभिड महामारी नियन्त्रणमै रहेको प्रधानमन्त्री केपी शर्मा ओलीले दाबी गरेका छन्। शनिबार अमेरिकी सञ्चार संस्था सिएनएनसँगको कुराकानीमा प्रधानमन्त्री ओलीले सो कुरा दाबी गरेका हुन ।

उनले भने,”अन्य छिमेकी मुलुकमा जस्तै नेपालमा पनि कोरोना भाइरस फैलिरहेको छ । तथापि कोरोना अहिले अन्डर कन्ट्रोलमा छ ।”

नेपालमा अहिले कोरोनाको दोस्रो लहर फैलिएको छ । पछिल्ला दिनमा दैनिक नौ हजारको हाराहारीमा नयाँ संक्रमित थपिएका छन् । त्यस्तै दैनिक ५० भन्दा बढी संक्रमितले ज्यान गुमाइरहेका छन् ।

प्रधानमन्त्री ओलीले यस्तो बेलामा कोरोनाविरुद्धको लडाइँ नियन्त्रणमा रहेको दाबी गरेका छिमेकी मुलुक, मित्र राष्ट्रहरू तथा अन्तर्राष्ट्रिय संघसंगठनसँग सहयोगको अपिल गरेका छन् । उनले महामारीविरुद्ध आवश्यक भ्याक्सिनलगायतका स्वास्थ्य सामग्री उपलब्ध गराउन अन्तर्राष्ट्रिय समुदायलाई आग्रह गरेका हुन् ।

उनले अन्तर्वार्ताका क्रममानेपालमा कोरोनाबाट हालसम्म तीन हजारभन्दा बढीले ज्यान गुमाइसकेको बताए । उनले यो संख्या कुल संक्रमितको एक प्रतिशतभन्दा कम भए पनि नेपालको सन्दर्भमा धेरै भएको बताए ।

उनले महामारी नियन्त्रणका लागि सरकार लागिपरेको जानकारी दिँदै अक्सिजन र आइसियुलगायतको प्रबन्ध मिलाइरहेको बताए । गत वर्ष नेपाल महामारी नियन्त्रण गर्न सफल भएको भन्दै प्रधानमन्त्री ओलीले जनताको लापरबाहीका कारण पुनः महामारी फैलिएको बताए । जनतालाई महामारीबाट सुरक्षित राख्न प्रयासहरू जारी राखेको पनि उनले बताए । यो समाचार नागरिक दैनिकमा छ ।