महामारीबाट जनताको जीवन जोगाउन लागि परेका छौ: प्रधानमन्त्री ओली

काठमाडौं– देशवासीका नाममा सम्बोधन गर्दै प्रधानमन्त्री केपी शर्मा ओलीले सोमबार नागरिकको जीवन रक्षाका लागि सरकार लागि परिरहेको बताएका छन् ।

त्यसक्रममा प्रधानमन्त्री ओलीले सरकार महामारीबाट जनताको जीवन जोगाउन लागि परेको बताएका हुन् ।

कोभिड–१९ महामारी नियन्त्रण, रोकथाम र उपचार गर्न सरकारले चालेका कदमलाई सहयोग गर्न देशवासीलाई प्रधानमन्त्री ओलीले आग्रह समेत गरेका छन् ।

प्रधानमन्त्री ओलीले भने, “हरेक नागरिकको जीवन रक्षा सरकारको पहिलो दायित्व हो । कुनै पनि नागरिक स्वास्थ्य सुविधाबाट वञ्चित हुन नपरोस् र महामारीका कारण कसैले जीवन गुमाउन नपोरोस् भन्नेमा सरकार संवेदनशील छ ।”

प्रधानमन्त्री ओलीले कोरोना महामारीबाट जनताको जीवन जोगाउनका लागि सरकारले आफ्ना सबै संयन्त्र परिचालन गरेको पनि बताएका छन् ।

प्रधानमन्त्री ओलीले स्थलमार्गबाट विदेशी नागरिकहरुको प्रवेशमा रोक लगाइएको जानकारी दिँदै नेपाली नागरिकहरुलाई चेकजाँच गरेर मात्र आउन दिने र संक्रमित भए उपचार गरिने बताए ।

हाल संक्रमण फैलिन नदिनका लागि विज्ञहरूको सुझावअनुसार नै निषेधाज्ञा लगाउनेदेखि अन्तर्राष्ट्रिय र आन्तरिक उडान रोकिएको प्रधानमन्त्रीको भनाइ छ ।

प्रधानमन्त्री ओलीले सरकारले चीन र रुससँग खोप खरिद प्रक्रिया सुरु गरेको पनि जानकारी दिए ।

प्रधानमन्त्रीले कोभ्याक्स सुविधामार्फत खोप ल्याउन सरकार प्रयत्नशिल रहेको पनि बताए ।