काठमाडौंमा ५ हजार प्रहरी परिचालन, १ सय ५० भन्दा बढी होल्डिङ सेन्टर

काठमाडौं- कोरोना संक्रमण बढ्न थालेपछि काठमाडौं उपत्यकामा निषेधाज्ञा जारी गरिएको छ ।

अधिकांश स्थानमा निषेधाज्ञालाई प्रभावकारी रुपमा कार्यान्वयन गराउन काठमाडौंका प्रहरी तैनाथ गरिएको छ । उपत्यका ५ हजार भन्दा बढी प्रहरी परिचालन गरिएको छ भने उपत्यकाभर १ सय ५० भन्दा बढी स्थानमा होल्डिङ सेन्टर बनाइएका छन् ।

विभिन्न स्थानमा स्पेशल चेक प्वाइन्ट राखेर चेकजाँच गरिएको छ । उपत्यकामा जारी निषेधाज्ञालाई व्यवस्थित गर्न प्रहरीका उच्च अधिकारीहरु नै फिल्डमा खटिएका छन् ।

काठमाडौं प्रहरी प्रमुख एसएसपी अशोक सिंहले सरकारले तय गरेको मापदण्ड पालना गराउन आफुहरु व्यस्त रहेको बताए । त्यस्तै अनावश्यक रुपमा हिँडडुल नगर्न सर्वसाधारणलाई सम्झाउने बुझाउने काम पनि प्रहरीले गरेको उनले बताए ।

जनतालाई सुरक्षित बनाउन आफुहरु पनि सुरक्षित हुँदै फिल्डमा खटिएको उनको भनाई छ ।

प्रहरीले उपत्यकाभित्रको जाँचलाई प्रभावकारी बनाउनेदेखि सीमाक्षेत्रमा आवतजावतमा समेत कडाइ गरेको छ ।