मनकामना केबुलकार बन्द गर्ने प्रशासनको आदेशप्रति व्यवसायीको असन्तुष्टि

काठमाडौँ– मनकामना केबुलकार बन्द गर्न जिल्ला प्रशासन कार्यालय गोरखाले आदेश दिएको छ। उक्त आदेशप्रति स्थानीय व्यवसायीदेखि यात्रुले असन्तुष्टि व्यक्त गरेका छन् ।

मनकामना मन्दिर लकडाउनदेखि नै बन्द रहेको र खुलेपछि पनि बन्द नै राखी भक्तजनलाई बाहिरबाटै स्वास्थ्य सुरक्षाका मापदण्ड पालनासहित पूजा चलाइरहेको अवस्थामा केबुलकारलाई बन्द गर्नु असान्दर्भिक रहेको कम्पनीको भनाइ छ ।

सरकारको निर्णय अनुसार मन्दिरमा नित्य पूजा, ध्यान तथा प्रार्थना मात्र गर्ने–गराउने आदेश भएको र सार्वजनिक यातायातमा समेत स्वास्थ्य मापदण्ड तोकिई चलाउने व्यवस्था भएको छ ।

केबुलकारमा समेत यही लागू हुने सरोकारवालाको बुझाइ छ ।

मनकामना केबुलकारका सञ्चालक राजेशबाबु श्रेष्ठले मन्दिर बन्द गर्दैमा केबुलकार बन्द गर्नू भन्ने जिल्ला प्रशासन कार्यालय गोरखाको मौखिक आदेश नेपाल सरकारको आदेशसँग बाझिएको बताए ।

सञ्चालक श्रेष्ठले भने, “मन्दिर बन्द हुँदैमा मनकामना क्षेत्रमै प्रवेश निषेध गर्नु न्यायोचित नहुनुका साथै मानव अधिकारमा र व्यावसायिक अधिकारमा ठाडो हस्तक्षेप हो।”

उनले तोकिएको स्वास्थ्य मापदण्ड पालना गर्ने र सचेत रहने कुरामा जोड दिँदै केबुलकार सञ्चालन गर्न पाउनुपर्नेमा जोड दिए ।