मेलम्चीको पानी खुमलटार, मीनभवन र अनामनगरतिर

ठमाडौं-आजदेखि काठमाडौंमा मेलम्चीको पानी वितरण सुरु भएको छ । आजबाट सीमित रुपमा वितरण थालिएको हो । काठमाडौं उपत्यका खानेपानी लिमिटेड (केयूकेल)को पुरानै पाइपबाट आजबाट सीमित ठाउँमा पानी वितरण थालेको हो ।

आइतबार खुमलटार, मीनभवन, महांकाल र अनामनगरस्थित ट्यांकीमा ४ करोड लिटर पानी भरेर वितरण थालिएको मेलम्ची खानेपानी उप आयोजना–२ निर्देशनालयले जानकारी दिएको छ ।

आज चार करोड लिटर पानी छाडेको दुई दिनपछि सुन्दरीजल र बालाजुमा पानी छाड्ने तयारी भएको आयोजनाले जनाएको छ । चैत २१ गते पानी पोखरी र बाँसबारीस्थित ट्यांकीमा दैनिक साढे आठ करोड लिटर पानी छाड्ने योजना रहेको छ ।

अनामनगर क्षेत्रका नयाँ लाइन जोडिएका १६ सय धारामा भने पाइलट प्रोजेक्टका रुपमा आजबाट चौबिसैघण्टा पानी दिइन थालिएको छ ।

केयूकेएल अन्तर्गत काठमाडौं उपत्यकामा एक लाख ८० हजार धारा छन् । वितरण थालिएको क्षेत्रमा कहाँकहाँ चुहावट हुन्छ भन्ने केयुकेएलले निरन्तर अनुगमन गर्ने भएको छ ।